Moabot sa P3 milyunes ang danyos nga gibilin sa sunog nga niulbo sa alas 7:08 sa Sabado sa gabii, Oktubre 29, 2022 sa Sitio Lower Lusimba Barangay Poblacion Pardo, Siyudad sa Sugbo.
Dali nga girespondehan sa mga babayeng bombero nga nangadestino sa Pardo Fire Station sanglit ubos sa ilang hurisdiksyon ang maong dapit.
Ang mga babayeng bombero nga bag-ohay pa lang opisyal nga gipailaila sa Cebu City Fire Office sa publiko, nasuwayan dayon ang ilang abilidad.
Si FO3 Fulbert Navarro, duty fire investigator, nibutyag nga duha ka mga balay ang nalamoy sa kayo nga giingong nagsugod sa panimalay sa usa ka Plasida Ambrad nga giukopahan sa anak niining si Jiggs Ceballos Ambrad.
Matod ni Navarro, base sa inisyal nila nga pagsusi sa nasunog nga balay, didto nagsugod ang kayo sa ikaduhang andana.
Si Navarro dili pa makasulti sa hinungdan sa sunog.
Ilang nadawat ang alarma nga gisaka dayon sa unang alarma sa alas 7:15 sa gabii samtang alas 7:26 gideklarar dayon nga nakontrolar na. Sa alas 7:28, hingpit nang napawong ang kayo.