MOABOT sa P4.6 milyones nga balor sa mga punoan sa marijuana ang gipang-ibot sa Barangay Kaluangan, lungsod sa Asturias, Cebu.
Ang Philippine Drug Enforcement Agency (PDEA) 7, Asturias PNP, Provincial Drug Enforcement Unit (PDEU), PIU, Navforcen ug PMFC naghiusa sa maong operasyon sa dihang kapin 11,000 ka mga punoan ang naibot.
Matod ni PDEA 7 Regional Director Levi Ortiz, ang maong marijuana plantation giingong gidumala ni Eduardo Camuangay apan wala kini maabti sa payag diin siya magpundohan.
Bisan paman si Camuangay pasakaan og kaso sa iyang pagpananom og marijuana subay sa RA 9165 kon Dangerous Drugs Act of 1972.
Sa laing bahin, mokabat sa kapin P3.8 milyones ang balor sa illegal nga drugas ang nasakmit sa kapulisan sa siyudad sa Sugbo sa managlahing anti-drug operation niadtong Septiyembre 7, 2020.
Ang Mabolo police station nakasakmit og 500 gramos sa gituohang shabu nga mobalor sa P3.4M gikan sa 19 anyos nga lalake sa Sityo Estacionan, Barangay Mabolo.
Samtang kapin sa P74,800 balor sa gituohang shabu nakuha atol sa buy bust operation sa Sityo Paradise, barangay Hipodromo.
Ang Parian police station nakasikop og high value individual sa Ibabao proper, Mambaling nga si Annabell Gonzales, 44, nakuhaan og 41 gramos nga shabu nga mobalor sa P278,800. (BBT, AYB)