P513K ayuda sa DSWD 7 sa mga biktima sa Pamplona massacre

P513K ayuda sa DSWD 7 sa mga biktima sa Pamplona massacre

Ang Department of Social Welfare and Development (DSWD) 7 nihatag og kinatibuk-ang P513,224.00 nga hinabang pinansyal ngadto sa mga survivor ug biktima sa insidente sa pagpamusil sa Brgy. San Isidro, Pamplona, ​​Negros Oriental niadtong Marso 4, 2023.

Namatay sa maong hitabo si anhing Gobernador Roel Ragay Degamo ug walo ka mga sibilyan nga nitambong sa tigom sa compound sa balay sa gobernador sa naasoy nga dapit.

Ang hinabang gihatag ngadto sa 21 ka survivors ug walo ka namatyan nga pamilya, diin 21 niini ang nagpaalim ug kasamtangang gi-admit sa nagkalainlaing ospital samtang, ang usa ka apektadong indibidwal nagpakita og sintomas sa trauma.

Ang mga gikatahong apektado sa pagpamusil gi-verify sa mga hingtungdan nga local government units (LGUs) ug DSWD 7 pinaagi sa Social Welfare and Development (SWAD) Team sa probinsya sa Negros Oriental.

Ang SWAD Team nagpahigayon og intake interviews ug naghatag og inisyal nga psychological first aid sa tanang namatyan nga pamilya ug biktima-survivors. Ilang gipahayag nga ang presensya sa departamento sa usa ka paagi nakahupay kanila sa kasakit tungod sa makalilisang nga panghitabo.

Gipaabot usab ang mga referral sa Malasakit Center alang sa coverage sa bayrunon sa ospital alang sa pipila ka mga indibidwal nga na-admit sa Negros Oriental Provincial Hospital.

Base sa database sa Disaster Response Operations Monitoring and Information Center (DROMIC) sa Summary of Assistance Provided on the Shooting Incident, sa kinatibuk-ang kantidad sa hinabang nga gihatag, ang DSWD 7 nihatag og P250,000 cash assistance para sa ubang support services, P90,000 cash para sa food assistance, laing P80,000 cash para sa burial assistance, ug P53,750 cash para sa medical assistance.

Ang Field Office nihatag usab og family food packs nga nagkantidad og P28,474 ug P11,000 para sa educational assistance.

Ang mga numero alang sa mga hinabang nga gihatag gilauman nga motaas pagkahuman sa padayon nga koordinasyon sa Field Office sa mga apektadong pamilya. Naa pay mga pamilya nga wala pa maka-claim sa ilang hinabang nunot sa pagsumite sa pipila ka documentary requirements ug medical check-ups.

Ang DSWD 7 mipagawas dayon og opisyal nga pamahayag, nga nagpasalig sa publiko nga walay benepisyaryo sa Pantawid Pamilyang Pilipino Program (4Ps) o bisan kinsang kawani sa DSWD ang naangol atol sa insidente.

Ang venue sa 4Ps registration layo sa lugar sa insidente.

Gipahunong usab sa DSWD 7 ang pagparehistro sa 4Ps aron masiguro ang kaluwasan sa mga potensyal nga benepisyaryo ug kawani ug aron respetuhon ang panahon sa kasubo sa probinsya. (PR)

Related Stories

No stories found.
SunStar Publishing Inc.
www.sunstar.com.ph