Ang Cebu City Hall mogasto og P53 milyunes alang sa pag-ayo sa rubberized track oval sa Cebu City Sports Center (CCSC) isip kabahin sa pagpangandam sa tinguha niini nga mo-host sa 2024 Palarong Pambansa.
Sa laing bahin, mokabat sa P30 milyones ang gikinahanglan alang sa renovation sa swimming pool, apan ang pundo sa maong proyekto maggikan sa pribadong sektor.
Giaprobahan sa Cebu City Council ang pagpaningil sa kantidad nga P53,275,161.40 ubos sa account no. 3392-50703990-58, o Other Infrastructure Assets - Renovation sa lainlaing Sports Facilities, atol sa regular session niadtong Miyerkules, Hunyo 7, 2023.
Si Cebu City Councilor Donaldo Hontiveros, chairperson sa committee on education sa konseho, maoy niduso sa maong resolusyon.
Si Konsehal Nestor Archival sa oposisyon, mipadayag sa iyang suporta sa maong lakang, apan iyang gihangyo ang proponent nga ipaagi sa tukmang proseso ang bidding sa proyekto. (JJL)