Moabot sa kapin P55 milyones ang danyos sa kinatibuk-an sa mga sunog nga ning-igo sa dakbayan sa Sugbo ug dakbayan sa Danao sa Huwebes, Hunyo 2 ug kadlawon sa Biyernes, Hunyo 3.
Unang alarma sa sunog gitubag sa mga sakop sa bombero sa hapon sa Huwebes sa Victor Village, Barangay Punta Princesa, Siyudad sa Sugbo.
Moabot og P2.7 milyones ang danyos sa duha ka balay nga nangaugdaw.
Pipila ka mga oras ang nakalabay, ang kabomberohan sa dakbayan sa Danao ug sikbit nga mga dapit nagkapuliki sa pagkombati sa kayo sulod sa 10 ka oras nga nikaon sa merkado publiko sa Brgy. Poblacion.
Mokabat sa P52.2 milyunes ang gibana-banang danyos sa sunog.
Si FO1 Russel Frits Abellana sa Danao City Fire Station nibutyag nga ilang nadawat ang alarma alas 8:18 sa Huwebes sa gabii gikan sa usa ka tawo nga nidagan aron sila pahibaw-on.
Matud ni Abellana nga sila niabot sa alas 8:18 ug pag-abot sa alas 8:30 ila usab nga gisaka sa third alarm.
“Kay light materials man naa didto...gilargo na og general kay gitan-aw ang kapasidad sa mga firetrucks sa sitwasiyon didto,” matod ni Abellana.
Dugang niya nga pag abot sa alas 9:14, gisaka dayon sa general alarm tungod na sa kadako sa kayo, diin ang ubang mga fire station sa ubang mga lokalidad gikinahanglan nga moresponde.
Sa inisiyal nga kasayuran sa BFP, nagsugod ang kayo sa tindahan sa usa ka Janice Capul. Ang likod sa tindahan niini nga namaligya og dry goods apil usab nga naugdaw.
Ang sunog gideklarar nga under control alas 9:52 sa gabii samtang hingpit nga napawong sa alas 6 na sa Biyernes sa buntag. “Kay ga overhauling pa, wa dayon gi declare nga fire out kay dugay man kaayo mapalong. Kontrolado ra didto sa sulod pero lisod siya pawngon. Daghan man gud mga mantika,” dugang ni Abellana.
SUNOG NA SAB
Samtang sa pasado sa alas 4 sa kaadlawon sa Biyernes, laing sunog na usab ang gitubag sa mga sakop sa bombero sa dakbayan sa Sugbo.
Ang nasunog mao ang usa ka barbekyuhan ug uban pang mga gagmay nga tindahan nga miresulta sa pagkaugdaw sa tulo ka tindahan nga midanyos og P360,000.