GIILA nga bag-ong drug player sa Barangay Duljo Fatima, Siyudad sa Sugbo, nasikop sa gihimong buy bust operation sa mga sakop sa Station 6 sa Cebu City Police Office pasado alas 2 sa hapon sa Martes, Pebrero 12, sa Spolarium street.
Moabot sa usa ka kilo nga gituohang shabu ang nasakmit sa kapulisan nga dunay P6.8 million base sa Dangerous Drugs Board (DDB) value.
Ang nasikop giila nga si Joxel Abellana Chan, hingkod, kinsa naila nga sakop sa Arche Abellana drug group nga naglihok sa Barangay Duljo Fatima.
Nakuha gikan kang Chan ang 11 ka medium size nga mga putos, usa ka dakong plastic sachet ug usa ka extra large nga putos nga motimbang ang tanan og usa ka kilo sa gituohang shabu.
Matod ni Chief Insp. Kenneth Paul Albotra, hepe sa Sawang Police Station, kapin sa usa ka buwan nila nga gipanid-an ang illegal nga negosyo ni Chan.
Giingong gikan sa National Bilibid Prisons sa Muntinlupa ang supply ni Chan sa syudad sa Sugbo. Ang maong tawo manawag nga magpadala og shabu.
“Gikan sa Munti. Unya naa siyay amo sa grupo unya tawag-tawagan ra siya nya ihatod didto. Well arranged ilang transaction,” matod ni Albotra.
Sa imbestigasyon, nagsugod sa iyang illegal nga negosyo si Chan duha ka tuig na ang nakalabay.
Apan bag-o pa pa nigawas ang iyang ngalan.
Aduna siyay gipangtug-an nga mga ngalan nga makatabang sa ilang follow up operations.
DRUG DEN
Samtang gironda sa mga ahente sa Philippine Drug Enforcement Agency 7 (PDEA) 7 ang usa ka drug den sa sitio Laguna, Baragay Lorega San Miguel, Siyudad sa Sugbo alas 12:30 sa udto sa Martes, Pebrero 12.
Siyam ka mga tawo nasikop lakip na ang mag live in partner nga drug den maintainers.
Ang mga nasikop mao silang Angelina Porlas ug Wilson Gomez, tag-iya sa balay nga gihimong suyopanan.
Lakip sa nasikop mao silang Jessie Agapay, Jhunrey Estodillo, Alfred Muit, Fernando Aronalles, Argie Icoy, Richard Tulda ug Pablo Nases Jr.