MOKABAT sa P7 milyones nga kantidad sa shabu ang nasakmit sa usa ka lalake atol sa operasyon sa kapulisan sa Crystal Compound, V. Rama St., Brgy. Guadalupe, dakbayan sa Sugbo Sabado sa gabii, Disyembre 8.
Kapin sa usa ka kilo nga gituohang shabu ang nasakmit sa Carbon Police Station pinangulohan sa ilang hepe nga si Chief Insp. John Kareen Escober.
Gibana-bana sa kapulisan nga moabot sa P7,480,000 ang kantidad sa maong illegal nga drugas.
Ang nasikop naila nga si Addreaainne Lester Mender alyas Ter, 28, kinsa nagpuyo sa maong dapit.
Alas 10:52 kagabii dihang nasikop si Mendez lakip nga nasakmit ang kapin usa ka kilo nga shabu.
Matod ni Chief Insp. Escober duha ka semana nilang gipanid-an ang suspek human milutaw ang iyang pangalan sa mga nadakpan sa Carbon police station nga didto sila mag kuhaan sa supply kang Mendez.
Tungod niini nakig alayon sila sa Guadalupe police station gabii aron mo lusad sa buy bust operation.