Usa ka kilometro nga dalan sa Barangay Cabagakian sa Dimiao, Bohol nahuman sa pagsemento pinaagi sa ayuda nga P7.5 milyunes gikan sa Department of Social Welfare and Development (DSWD) pinaagi sa Kapit-Bisig Laban sa Kahirapan Comprehensive and Integrated Delivery of Social Services (KALAHI-CIDSS).
Ang proyekto gisugdan sa Agusto 2021 isip kabahin sa Kapangyarihan at Kaunlaran sa Barangay (KKB) funding sa programa, diin gitumong sa paghatag og livelihood opportunities samtang nagtubag sa ubang butang nga gikinahanglan sa paglambo sa kinabuhi sa komunidad.
Tungod sa bag-ong napalambo nga dalan sa Cabagakian, nahimong dali ang pagbiyahe sa ilang produkto, pagkuha sa serbisyo sa kagamhanan ug dunay umaabot nga pasilidad nga tukuron sa dapit subay gisaad sa local government unit (LGU) sa Dimiao.
Ang LGU Dimiao motukod og barangay center nga mahimong sentro sa basic social services sama sa rural health unit nga gisugyot alang sa dapit samtang, ang gipalambo nga dalan gitumong sa pagtaas sa zonal value sa kayutaan sa dapit aron ang katawhan dunay igong pagsalig sa kagamhanan.
Ang proyekto nilungtad og pito ka buwan, lakip sa capacity-building ug pagbansay sa mga boluntaryo.
“Sa akong pila ka tuig nga pagpanerbisyo sa katawhan, karon pa gyud ko nakasinati nga nahatagan og katumanan ang among gipangandoy nga access road gikan sa DSWD. Nahimugso ang among mga damgo tungod sa nagkahiusang pag paningkamot sa katawhan,” matod ni kanhi Cabagakian barangay kapitan Proceso Lagumbay nga nahimong saksi sa iyang komunidad nga nausab tungod sa proyekto gikan sa usa ka damgo lang apan nahimong tinuod sa pagtunol sa bag-ong natapos nga proyekto tungod sa KALAHI-CIDSS.
Si DSWD Assistant Secretary Rodolfo M. Encabo, uban sa DSWD Field Office VII Assistant Regional Director for Administration Antonio R. Dolaota, mao ang nangulo sa pag-turnover sa community project ngadto sa katawhan sa Cabagakian.
“The government is of the people, by the people, and for the people. This is the promise of our government in heeding the call of nation-building,” matod ni Encabo samtang nipatigbabaw sa kaimportante sa corruption-free community. (PR)