Mokabat sa P4 bilyones ang gikinahanglan alang sa Metropolitan Cebu Water District (MCWD) nga ilisan ang tanang karaan nga tubo sa mga service area niini.
Aron masiguro nga ang tubig makaabot sa mga konsumidor ug aron malikayan ang pag-usik sa tubig tungod sa pagtulo ug pagkaguba sa mga tubo.
Apan, ang chairman sa board sa MCWD nga si Jose Daluz III niingon nga ang kakuwang sa pundo nagpugong sa water district sa pag-update ug pag-ilis sa pipila ka mga tubo nga 50 anyos na, ilabi na niadtong mga tubo sulod sa dakbayan sa Sugbo.
Ang Commission on Audit (COA) una nang nag-flag sa MCWD tungod sa pagsaka sa dagan sa non-revenue water (NRW), gikan sa 25.26 porsyento sa 2020, 29.04 porsyento sa 2021, ug 32.67 porsyento sa 2022, nga miresulta sa tinuig nga pagkawala sa kita sa water district sa aberids nga di mominos P117.759 milyones.
Ang Local Water Utilities Administration (LWUA) mimando niadtong 2009 nga ang tanang water districts kinahanglang pakunhuran ang maximum NRW niini ngadto sa 20 porsyento.
Si Daluz nagkanayon nga ang MCWD nagtan-aw sa upat ka mga pamaagi aron matubag ang maong problema, lakip na ang pag-apply og loan, pagpangayo og tabang gikan sa nasudnong kagamhanan ug sa local government units, ug pagsulod sa public-private partnerships (PPP) kon adunay private entity nga andam makig-partner sa MCWD.
Si Daluz, sa pakighinabi sa SunStar Cebu niadtong Domingo, Sept. 10, 2023, niingon nga bisan kon konsiderahon ang kasamtangang pinansyal nga kapasidad sa water district, mokabat lang sa P1 bilyones ang ilang ma-loan.
SUPLAY SA TUBIG
Matod ni Daluz, sukad ang kasamtangang board of directors milingkod sa ilang lingkoranan niadtong 2020, nakaprodyus na sila og dugang 60 ngadto sa 70 milyones ka litro kada adlaw (MLD) gikan sa kasamtangang produksyon sa tubig sa wala pa sila molingkod.
Gipaabot usab nga mosaka kini sa higayon nga makasugod na ang seawater desalination project sa lungsod sa Cordova. Kini adunay kapasidad nga 20 MLD nga adunay potensyal nga molapad hangtod sa 50 MLD.
Ang MCWD nagprodyus og 270,000 cubic meters nga tubig gikan sa tanang tinubdan sa tubig niini matag adlaw.
Wala pa kini katunga sa inadlaw nga panginahanglan sa tubig nga 560,000 cubic meters sa franchise area niini nga naglangkob sa Talisay City, Cebu City, Mandaue City, Lapu-Lapu City; ug ang mga lungsod sa Cordova, Consolacion, Liloan ug Compostela.
Apan matod ni Daluz, kining tanan nga mga paningkamot aron madugangan ang suplay sa tubig aron matubag ang panginahanglan sa mga konsumidor mausik kon dili ilisan ang mga tubo.
WAY TUBO
Iyang gihimo nga pananglitan ang mga paningkamot nga gihimo sa Maynilad Water Services Inc. nga nakapaus-os ngadto sa 15 porsiyento sa ilang NRW human sa pagbutang ug pag-ilis sa mga karaang tubo.
Adunay pending application ang MCWD atubangan sa LWUA nga orihinal nga gitakdang moepekto niadtong Hulyo 1; bisan pa, ang MCWD wala pa makadawat og tubag gikan sa LWUA, tungod kay ang board sa administrasyon wala pa mag-convene.
Ang mga distrito sa tubig gitugotan nga mag-aplay alang sa usa ka pag-adjust sa rate sa tubig matag lima ka tuig, apan gipili sa MCWD nga dili mopaumento sa bayranan sa tubig sa 2020 tungod sa pandemiya sa coronavirus.
Si Daluz sa sayo pa miingon nga ang gisugyot nga usbaw nagtumong sa pagtabon sa mga galastuhan sa nagpadayon ug umaabot nga mga proyekto sa MCWD.
Si MCWD information officer Minerva Gerodias, sa miaging pakighinabi, niingon nga gikan sa 2015 hangtod karon, ang MCWD nigasto og P2.1 bilyones sa expansion ug rehabilitation projects aron mapalambo ang serbisyo, ingon man P12 bilyones sa operational expenses. / JJL