Ang pag-atras sa pag-apil sa usa ka contingent sa Sinulog Grand Parade dili makaapekto sa kadaugan sa ilang festival queen.
Kini ang gipasalig ni Vince Escario, founding chairman sa Search for the Sinulog Festival Queen, niadtong Biyernes sa gabii, Enero 13, diin ang representante sa dakbayan sa Talisay, Kiara Liane Wellington, maoy gikoronahan nga Sinulog Festival Queen 2023.
Ubos sa guidelines sa Search for Sinulog Festival Queen 2023, ang kandidata “must be the lead dancer of her contingent and must participate in the street dancing competition during the grand parade.”
Ang kandidata nga mapakyas sa pagsayaw atol sa kompetisyon sa street dancing “matangtang sa trono” ug “bawion ang mga premyo ug awards.”
Dili makaapil si Wellington sa street dancing sa Dominggo, Enero 15, tungod kay niatras ang contingent sa Talisay City sa grand parade ug ritual showdown nunot sa pahibawo ni Gobernador Gwendolyn Garcia nga 10 ka contingents gikan sa Probinsiya sa Sugbo dili mosayaw sa South Road Properties (SRP).
Si Garcia niingon nga iyang gikonsulta ang mga mayor sa 10 ka contingents -- Carmen, Carcar City, Mandaue City, Moalboal, Naga City, Talisay City, Tuburan, Toledo City, Lapu-Lapu City, ug Consolacion -- ug nakahukom sila nga dili na mopasundayag sa maong kalihukan sa SRP alang sa “health and safety” sa mga contingents.
Ubay-ubay na sa mga tawo ang mipabuhagay sa ilang mga kabalaka bahin sa SRP isip venue sa grand parade ug ritual showdown, tungod kay wala pa nahuman ang mga construction, hinungdan nga lapok ang lugar.
“I will take it upon myself to make the hard decision in order to protect the constituents of the province of Cebu. Kay labaw sa tanan, ang panglawas ug kaluwasan sa atong mga konstituwente ang akong unahon,” matod ni Garcia niadtong Huwebes, Enero 12 .
Giingon ni Escario nga bisan pa sa pag-withdraw sa 10 ka mga contingent “di sila angay mabalaka.”
“In the event that the Sinulog Festival 2023 and her court (her runners-up) will come from and represent from a contingent that will not be performing on Sunday, that is no cause for any concern,” siya niingon.
Siya nidugang nga “no disqualification will happen,” apan ang mga mananaog mopasundayag gihapon atol sa Best of Cebu portion sa udto sa SRP sa Dominggo.
Si Sinulog Foundation Inc. executive director Elmer Labella niingon nga tungod kay nangandam na ang mga festival queen, dili na lang sila ma-disqualify.
Bisan pa sa mga kabalaka sa venue ug withdrawals, si Labella miingon nga “girespeto niya ang rason sa gobernador, sa iyang mga kabalaka.”
“We have to go on with our Sinulog, our One Cebu Sinulog 2023,” matod niya.
Ang Sinulog Festival Queen 2023 gipahigayon sa Cebu City Sports Center niadtong Biyernes sa gabii.
Uban kang Wellington ang mga festival queens gikan sa Carcar City (Angelica Macasero, first runner-up), Toledo City (Amor Beah Singh, second runner-up), Lapu-Lapu City (Lourelle Henj Ando Manlosa, third runner-up) ug Inayawan ( April Joana Zapanta, fourth runner-up).
Nakadawat si Wellington og P150,000, gawas sa menor nga premyo. / Eiver Ky Villegas, USJ-R Intern, LMY