SA PAGSUGOD sa klase Lunes, Hunyo 3, 2019, labing maayo nga pabawnan og payong ang mga tinun-an.
Kay grabe ka init sa panahon sa buntag pa lang ug udto, apan posibleng makasinati og katag nga pag-ulan sa hapon.
Kini ang gitug-an ni Romeo Aguirre, weather specialist sa Philippine Atmospheric, Geophysical and Astronomical Services Administration Mactan.
Dugang ni Aguirre, nga mas maayo usab nga pabawnan og daghang tubig nga mainom ang mga bata kay ang temperatura anaa gihapon sa 27 degrees celsius ngadto sa 34 degrees celsius.
Aduna kini heat index kun kainit nga mabatyagan sa tawo nga 42 hangtud sa 44 degrees celsius
Gipasabot ni Aguirre nga ang hangin karon, imbes magsugod na unta ang habagat, nibalik nga gikan sa silangan ngadto sa habagatang silangan, hinungdan nga nimenos na usab ang mga pag-ulan.
Aduna hinuon mga pundok sa panganod dapit sa Eastern Visayas nga mao'y nagdala karon og mga panagsang pagpanag-um ug pag-ulan.
Ang susama nga pagapanag-um ang usahay moabot sa Central Visayas ug mao hinungdan nga makasinati kita og hinay nga pag-ulan sa hapon o sa kagabhion. (Superbalita Cebu)