Ang Habagat o Southwest Monsoon opisyal na nga natapos, sumala sa state weather bureau sa advisory sa Huwebes, Oktubre 12, 2023.
Kini nagpasabot nga ang Pilipinas anaa na karon sa hinayhinay nga pagbalhin ngadto sa Northeast Monsoon o Amihan, nga mahimo’ng dayag ug madeklarar sa umaabot nga mga semana, matod ni Nathaniel Servando, officer-in-charge sa Philippine Atmospheric, Geophysical and Astronomical Services Administration (Pagasa).
“Ang bag-o nga mga pag-analisar nagpakita nga usa ka mahinungdanon nga paghuyang sa Southwest Monsoon ang naobserbahan sa milabay nga pipila ka mga adlaw. Dugang pa, ang pagpalig-on sa high pressure system sa East Asia nagdala ngadto sa usa ka hinay-hinay nga pagbag-o sa mga pattern sa panahon,” dugang niya sa advisory.
Ang Habagat gihulagway nga nagsagol ang init ug basa nga hangin gikan sa habagatan-kasadpan nga nagdala og pag-ulan sa kasadpang bahin sa Pilipinas gikan sa Mayo hangtod sa Septiyembre.
Kalabot sa nagpadayong El Niño, ang Pagasa niingon nga mas dako ang posibilidad sa ubos sa normal nga kondisyon sa pag-ulan, nga makahatag og negatibong epekto, sama sa ting-init ug hulaw, sa pipila ka mga dapit sa nasod.
Kini nga mga negatibo nga epekto, dugang niini, sagad masinati sa katapusan nga quarter sa 2023 hangtod sa unang quarter sa 2024.
“This may adversely affect the different climate-sensitive sectors such as water resources, agriculture, energy, health, public safety, and other key sectors in the country,” sumala sa Pagasa.
Gipaniguro niini sa publiko nga padayon ang pagmonitor sa kahimtang sa panahon ug klima sa nasod.