Walo ka mga baboy gikan sa isla sa Negros nga nangamatay samtang gibiyahe luwan sa usa ka trak ibaligya unta og barato, apan nasanta ni Mandaue City Mayor Jonas Cortes dihang iyang naagian samtang naghunong ang sakyanan sa dan sa Barangay Casili sa mao nga Siyudad, Huwebes alas 7 sa buntag, Hulyo 23, 2020.
Apan matod ni Dr. Karen Merilles, city veterinarian, nga posibleng ang gikamatyan sa mga baboy mao ang heat stroke, di African Swine Fever (ASF).
Sa nakita ni Merilles, himsog ang mga baboy ug ang laing 122 nga kuyog niini sa truck.
Nagtuo siya nga wa na makaagwanta ang walo ka mga baboy tungod sa kahuot sa truck ug kalayo sa biyahe hinungdan sa pagka-heat stroke.
Gibutyag sab ni Merilles nga gipahibawo sila ni Cortes sa maong panghitabo human naagian sa mayor sa usa ka dan sa Barangay Casili nga adunay walo ka mga baboy nga patay na nga gikanaog sa truck.
Ibaligya unta ang mga baboy nga patay na sa mas ubos nga presyo, apan gipugngan ni Cortes ug gipahibawo silang Merilles.
Gipasabot ni Merilles nga di angay nga ibaligya o kan-on ang nangamatay na nga baboy sa wala hibaw-ing rason sa wa pa giihaw tungod kay mao kini ang gitawag og "double dead".
Mamahimo kining makadaot sa mga konsumedor tungod kay mahimong masakit ang mga tawo kay wa matino kon duna ba kini sakit, sigon ni Merilles.
Tungod niini, giawhag ni Merilles ang mga konsumedor nga kon mahimo, adto lang mopalit og mga karneng baboy sa merkado o supermarket nga siguradong anaay sertipiko nga limpyo kini nga gibaligya. (KFD)