Tungod sa nahimutangan sa Brgy. Cogon Pardo nga usa naa sa ubos, giprayoridad sa barangay ang drainage ug paglimpyo sa mga basura. Matod ni Barangay Kapitan Harry Eran, sa interbyu sa Superbalita Cebu niadtong Biyernes, Agusto 11, nabalaka siya sa sitwasyon sa Cogon Pardo tungod sa terrain niini.
Ubos sa iyang pamunoan, naghimo sila og kongkreto nga creek boundaries o mga utlanan sa sapa aron di na mosuyla ang tubig gikan sa kabukiran.
Ang boundaries mao ang riprap ug koral nga kongkreto nga nagpugong sa tubig nga moawas panahon sa uwan.
Gigastuhan kini og P100 million. Apan ipadayon pa kini niya kay gikinahanglan ang drainage system nga mosangko sa kadagatan.
Sama usab sa ubang mga barangay, tungod sa nagtubo nga populasyon, ang basura usa sa mga dakong problema.
Tungod niini, si Iran nipalit og duha ka garbage trucks nga wa mahimo sa iyang gisundan nga mga administrasyon.
“Kita pa lamang sa atong administrasyon gikan 2013 hangtod karon ang nakapalit og brand new dumptruck in addition sa gihatag sa Cebu City Government,” matod ni Eran sa Superbalita Cebu.
Aron mas epektibo ang pagkolekta sa mga basura, duna silay gipahigayong mga pulongpulong sa matag sityo, kauban ang mga sakop sa Sangguniang Kabataan (SK) aron sa pagpahinumdom sa takda sa mga paglabay sa basura.
Duna usay kaugalingong fire truck, ambulansya ug coaster bus ang barangay.
KALIKUPAN
Kanunay makita sa kadaghanan ang mga basura mahabilin dapit sa baybayon human sa pagtaob sa tubig dagat. Ang pagpatuman sa coastal clean up mao ang usa sa mga epektibong solusyon aron kanunay limpyo ang baybayon sa Cogon Pardo.
“Regular coastal clean up” ug pagkolekta sa mga basura ang ilang gihimo, matod sa kapitan.
Mapasigarbuhon kaayo si Eran nga bisan coastal area, ang barangay sementado og mga karsada
HINABANG
Ang iyang administrasyon naggahin og pundo alang sa tabang pinansyal sa mga lumolupyo nga nagkinahanglan og mga tambal, medical check-up, ingon man alang sa mga senior citizen ug persons with disabilities.
Nagpahigayon usab og mga regular check-up ang barangay health center, naghatag og libreng bakuna ug feeding program.
Naila usab sila nga numero unong blood donor sa tibuok Sugbo. Kaduha sa usa ka tuig silang nagpahigayon og blood donation program.
Sa di madugay, mapalambo na nila ang tourist spots ug historical sites sa barangay.
MGA TINGUHA
Iyang nakita nga bisan sa kadako sa Cogon Pardo, wa kini kaugalingon nga elementary school ug public market.
Nagtinguha siyang makabaton niini ang barangay ubos sa iyang pamunoan.
“That is something we are looking forward”, matod niya.
“Hopefully, this year 50 million pesos ang ibutang sa atong kongresista. Kining atong multi-purpose building, particular sa atong basketball court, nga i-2nd floor na”, dugang ni Eran. (Cherry Ann Virador, Benedicto College Intern / Reporter)