SA PAG-IMPLEMENTAR na unya sa cash-based budgeting karong tuiga, posibleng maapektohan ang pagpatukod og dugang nga mga school building sa Central Visayas.
Gibutyag sa regional director sa Department of Education (DepEd) 7, Dr. Juliet Jeruta, nga aduna lay gitagana nga usa ka school building matag legislative district ubos niining maong pamaagi sa pagpundo sa proyekto sa gobyerno.
Gani lukop nasud aduna la’y 1,000 ka classroom allocation ang gihatag ug gikinahanglan nga mapatuman sud sa 2019.
Gipasabot ni Jeruta nga test period ang 2019 aron masukod kon makapahuman ba og implementar sa maong mga school buildings ang mga gihatagan og gahin.
Usa ang Central Visayas nga nahatagan sa maong gahin nga usa matag legislative district.
“So kon mapakita nga ang minimal number kayang-kaya natin, so ang cash-based budgeting is really the response,” matod ni Jeruta.
Ang cash-based budgeting mao ang usa sa mga gitudlong hinungdan sa daghang budget cuts.
Ubos niining maong sistema, ang mga government agencies gikinahanglan nga gamiton ang ilang budget allocation sulod sa fiscal year.
Gihatagan lamang sila og tulo ka buwan nga grace period aron mapatuman.
Kini dako ang kalahian sa naandan nga obligation-based budgeting diin ang mga ahensiya sa gobyerno adunay duha ka tuig aron magamit ang ilang budget allocations.
Dugang sa DepEd 7 regional director nga kon di magamit ang maong pundo nga gitagana karong tuiga alang sa pagpatukod og mga classrooms, ibalik kini sa nasudnong pagamhanan ug mo-request na pod pagbalik ang ahensiya og budget alang sa pagpatukod sa mga school building.
Apan tungod sa kalangan sa pagpasar sa budget alang sa tuig 2019, aduna na lamang pito ka bulan ang DepEd 7 sa pag-implementar sa pagpatukod og school building katambayayong ang Department of Public Works and Highways (DPWH),
“Let’s see kung ma-implement yan kahit isa lang within the 7 months period,” dugang ni Jeruta.