Gipasakaan og reklamo sa Office of the Ombudsman Visayas ang mga miyembro sa Sangguniang Bayan (SB) sa Palompon, Leyte gumikan sa giingong pagpanglimbong ug illegal nga transaksyon sa gasolina ug krudo.
Ang reklamo nadawat na sa buhatan sa Ombudsman.
Si Vergelio Padilla Jr., population program worker sa lokal nga kagamhanan sa Palompon, nipasaka sa reklamo batok kang Vice Mayor Ramon Oñate, mga konsehal nga sila si Margarito Bensig, William Balasabas, Esperanza Sumalinog, Emmanuel Laurente, Consuelo Bonghanoy, Ranulfo Gaspan Sr., Jonathan Yap, Rene Camposano, ug Evana Kirstie Misagal.
Lakip sa gireklamo ang mga drayber nga sila si Alfredo Lubiano, Ranulfo Gaspan Jr., Pablo Chavarria ug mga job order nga sila si Jeric Cuizon, Dario Raymundo, Renato Egot, Danilo Franco, utility worker Victoriano Capendit, Debbie Ann Dignos ug tag-iya sa White Rose Petron Service Station nga si Allan Ang.
Ang reklamo ni Padilla nagagikan sa illegal nga transaksyon sa gasolina tali sa SB ug White Rose Petron.
Base sa dokumento nga gipakita ni Padilla, dunay tulo ka mga multicab nga naka-assigned sa SB nga dugay na nga nangaguba ug wa na gigamit.
Base sa dokumento, dunay mga biyahe ang mga sakop sa SB gikan Disyembre 2020 hangtud Marso 2021, gamit ang tulo ka multicab ug makadaghang higayon nagpatubil sa Petron.
Apan sa gihimong pakisusi, nasakpan nga bugos ug sayop ang deklarasyon sa trip tickets, fuel, oil, lubricants withdrawal slip ug charge invoice gumikan kay ang tulo ka multicab dugay na kaayong guba, dili na magamit ug naa na sa junk yard.