Pormal nga giinagurahan sa lungsod sa Pamplona sa Negros Oriental ang 32-unit isolation facility nga nagkantidad og P25.4 milyunes dili pa lang dugay.
Usa kini ka proyekto nga resulta sa pakigtambayayong sa Department of Social Welfare and Development (DSWD), pinaagi sa Kapit-Bisig Laban sa Kahirapan Comprehensive and Integrated Delivery of Social Services (KALAHI-CIDSS), usa ka community-driven development program nga nagtumong sa pagdugang ang mga kahinguhaan sa local government unit sa pagtubag sa pandemiya ug uban pang kalamidad pinaagi sa partisipasyon sa katawhan.
Ang probinsya sa Negros Oriental ug ang lungsod sa Pamplona naglantaw nga ang KALAHI-CIDSS nga mga proyekto sa community volunteers makatabang nila sa paghimo ug publikong ospital gikan sa isolation facility nga kompleto sa medical supplies, ekipo, ug canopy para sa barangay health stations.
Aron matuman ang panglantaw sa local government unit sa Pamplona sa paghatag sa ilang katawhan og access sa batakang medikal nga pag-atiman, nakig-alayon sila sa KALAHI-CIDSS nga miresulta sa mga proyekto sa komunidad.
Kini nga physical accomplishments kay produkto sa partisipasyon sa volunteers nga mitabang atol sa pagpatuman niining KALAHI-CIDSS NCDDP Additional Financing project ingon man ang local counterpart nga kontribusyon sa LGU Pamplona sa porma sa cash, labor, ug pagpalit sa 232,039 sq. m lote diin nahimutang ang isolation facility.
Ang mga opisyal sa Local Government Unit sa Pamplona ug Province of Negros Oriental, uban nila ni DSWD Undersecretary Jerico Francis L. Javier ug DSWD Field Office VII Shalaine Marie S. Lucero, atol sa inagurasyon sa Municipal Isolation Facility sa Pamplona. (PR)