Usa ang samdan atol sa pagpanunggab tungod lang sa tanom nga butig alas 11:50 sa buntag sa Biyernes, Oktubre 14, sa Das Village 1, Brgy. Das, dakbayan sa Toledo.
Si Madricor Bagaan Almodiel, 51, minyo nagpuyo sa lugar, samdan sa tiyan human giingong dunggaba sa suspek nga giilang si Venancio Jonson Albarina, 62, minyo, silingan.
Si Police Staff Sgt. Joselito Genom, imbestigador sa Toledo Police Station nga nahinabi sa Superbalita Cebu, nagkanayon nga sila si Almodiel ug Albarina dugay nang nagkabangi gumikan sa luna nga ilang gitikad.
Ang biktima nanguha og butig kay isagol sa linat-ang tiil sa baboy, apan ang asawa ni Albarina nibadlong sa biktima kon nganong nanguha sa tanom.
Ang biktima nitubag nga walay magbuot niya kay iyaha kining tinanom.
Niinit ang lalis kay pulos sila nangangkon nga maoy tag-iya sa butig.
Niabot ang suspek ug niduol busa sila na sab ni Almodiel ang nagkalalis.
Tungod sa ilang mainit nga panaglalis, giingong gidunggab ni Albarina si Almodiel, kinsa naigo sa tiyan.
Ang biktima gidali sa pagdala sa tambalanan sa dakbayan sa Toledo.
Ang kapuyo sa biktima nga si Teofilia Galano Chiong dali sab nga nangayo og abag sa kapulisan.
Ang suspek napusasan ala 1:30 sa hapon human sa pagreport ni Chiong.
“Niinsister man daw ang asawa sa suspek nga ilaha ang butig unya ang biktima nasuko kay siya may nagtanom,” dugang ni Genon.
Sumala niya nga sa una pa nag-ilog ang biktima ug suspek sa utlanan sa yuta nga ilang gitikad.
Nasuta sa kapulisan nga ang suspek natigbasan na sa kapuyo ni Almodiel.
Duna silay bista sa kaso karong Lunes, gawas niini nadala na sab sila sa barangay hall alang sa husay.
Ang asawa sa biktima gikataho nga gipitesyunan sab sa mga silingan kay gikataho nga kusog mangilog sa mga utlanan sa umahan.
Giandam na sa kapulisan ang tukmang kaso batok sa suspek.