Human sa tulo ka tuig nga pandemiya, ibalik sa Dakbayan sa Mandaue ang Panagtagbo Festival karong adlawa, Mayo 6, 2023.
Mokabat sa 500 ka personnel ug force multipliers sa Mandaue City Police Office (MCPO) ang ipakatap alang sa festival.
Si Mandaue City Police Office (MCPO) Director Col. Jeffrey Caballes niingon nga adunay mga polis nga gikan sa Cebu City Police Office (CCPO) ug Lapu-Lapu City Office (LLCPO) aron motabang sa seguridad sa kalihukan.
Ang Panagtagbo Festival adunay 100 ka mga performer gikan sa 26 sa 27 ka mga barangay sa dakbayan nga giorganisar ngadto sa walo ka mga cluster.
Si City Councilor Jennifer del Mar, executive committee sa Mid-year Cultural Summit, nitug-an sa mga tigbalita sa Huwebes, Mayo 4, 2023, nga ilang giandam ang pipila ka bleachers duol sa Mandaue City Heritage Plaza ground alang sa senior citizens ug persons with disabilities (PWDs) nga motan-aw sa street dancing showdown sa mga contingent.
Magsugod ang parada alas tres sa hapon.
Magsugod ang street dancing gikan sa A.C Cortes paingon sa Mandaue City Cultural and Sports Complex, diin ipahigayon ang showdown ug Panagtagbo Festival Queen.
Matod ni Del Mar nga nagpaabot sila sa final nga kompirmasyon kon kinsa ang gipaabot nga mga bisitang VIP nga moanhi alang sa maong aktibidad, apil na si Gobernador Gwendolyn Garcia.
Gipaabot sa mga opisyal sa Dakbayan nga ang festival makadani sa lokal ug langyaw nga mga turista.
Ang maong aktibidad nahisubay sa fiesta ni St. Joseph The Worker nga saulogon sa dakbayan karong Mayo 8. (HIC)