Local News Official
Local News OfficialSunStar File Photo

Panawagan alang sa nominasyon sa Huwarang Pantawid Pamilya '24

Ang Department of Social Welfare and Development Field Office VII (DSWD) na­ngita og bag-ong mga ambassador sa pamilya alang sa Pantawid Pamilyang Pilipino Program (4Ps).


Ang pagpangita bukas sa ta­nang benepisyaryo sa pamilya sa 4Ps ug kinahanglang adunay amahan, inahan, anak, o mga anak, solo nga ginikanan, ug ilang anak o mga anak.


Ang Huwarang Pantawid Pa­milya nagtumong sa pag-ila sa mga benepisyaryo sa pamilya sa 4Ps nga nagmintinar sa lig-on nga relasyon sa pamilya, nagpakita sa positibo nga mga mithi nga Pilipino, ug nagmugna og positibo nga epekto sa komunidad diin sila nagpuyo.


Ang mga nominado kinahanglang benepisyaryo sa programa sulod sa labing minos duha ka tuig, adunay maa­yong baroganan sa komunidad nga walay mga rekord nga makadaut, kansang kita dili gikan sa sugal, prostitusyon, child labor, extortion, o uban pang susama nga illegal nga mga kahinguhaan, kinahanglang 100% compliant sa tanang kondisyon sa programa, ug level 2 o level 3 sa pinakaulahing Social Welfare and Development Indicator (SWDI) assessment sa DSWD.


Ang criteria sa pagtuboy sa usa ka pamilya:
○ nagmintinar sa lig-on nga mga bugkos o harmonious nga relasyon ug nagpasiugda sa mga mithi nga Pilipino bisan pa sa mga hagit nga dala sa kakabos (25%),


○ naningkamot sa pagpalambo sa kahimtang sa kinabuhi taliwala sa lisod nga mga sitwasyon (20%),


○ aktibo nga nalambigit sa mga kalihokan sa komunidad (20%),
○ positibo nga naghisgot bahin sa mga relasyon sa pamilya nga angay sundon (20%), ug


○ pamilya nga nagpraktis ug nagpasiugda sa himsog nga pagkinabuhi ug nag-atiman sa palibot (15%).


Ang mga nominador kinahanglang mosumitir sa mga su­lat sa nominasyon ug pag-endorso uban sa sinulat nga Salaysay ng Buhay ng Pamilyang 4Ps sa nominado nga pamilyang 4Ps.


Ang mga interesadong nominado mahimong moduol sa 4Ps city ug municipal links (C/MLs) para sa kompletong detalye sa pagpangita.


Ang dungan nga pagpangita sa probinsya sa Bohol, Cebu, Negros Oriental, ug Siquijor karong Agusto 9, 2024.


Ang provincial first-placers magtigi sa regional level. Laing set sa validation ug judging ang magtino sa regio­nal winner. Ang tanang provincial ug regional winners ma­kadawat og cash prizes ug certificates of recognition.
Ang modaog sa regional search motambong sa Natio­nal Pantawid Pamilya Family Day sa kataposang semana sa Septiyembre sa Metro Manila, uban sa ubang regional winners gikan sa tibuok nasod.


Sa nakalabay nga Huwarang Pantawid Pamilya regional winners gikan sa Central Visayas region nakasulod sa national level, nga mao: ang pamilyang Sederiosa gikan sa Sagbayan, Bohol, nabutang sa fourth runner-up niadtong 2013; ang Ewican fami­ly gikan sa Carmen, Bohol, se­cond runner-up, niadtong 2014; ang pamilyang Torrentira gikan sa Sagbayan, Bohol, nahimong second runner-up niadtong 2015; ang Garay Family gikan sa Jagna, Bohol, maoy nakadaog sa titulo isip grand winner sa Huwarang Pantawid Pamilya niadtong 2016; ang pamilyang Catubig gikan sa Maria, Siquijor, nabutang fourth runner-up niadtong 2017; ug ang pamilyang Campugan gikan sa Cordova, Cebu, maoy second runner-up niadtong 2018.


Sa 2019, ang mga kompetisyon sa nasyonal nga lebel mihunong, ug ang tanan nga mga mananaog sa rehiyon nahimong mga nasudnong mananaog. Niadtong panahona, ang pamilyang Elardo nga taga Badian, Cebu, maoy nirepresentar sa rehiyon.


Ang pagpangita adunay tulo ka tuig nga pahulay sa panahon sa pandemiya ug mibalik niadtong 2023. Ang Dela Peña gikan sa Barangay Nagboalao, Basay, Negros Oriental, maoy regional winner sa miaging tuig.


Ang 4Ps mao ang nag-unang programa sa gobyerno sa pagwagtang sa kakabus nga namuhunan sa kahimsog, nutrisyon, ug edukasyon sa mga kabus nga panimalay nga kwalipikado sa programa.


Uban sa psychosocial ug educational nga mga sangkap nga gihatag pinaagi sa Family Deve­lopment Session (FDS), ang mga benepisyaryo makapauswag ug makapadayon sa kaayohan. Giim­plementar pinaagi sa DSWD, ang programa gi-institutionalize niadtong 2019 pinaagi sa Republic Act 11310, o ang 4Ps Act. (PR)

SunStar Publishing Inc.
www.sunstar.com.ph