Pangkobra na mo: Comelec sa maestra

GATUSAN pa sa mga magtutudlo sa Mandaue City ang wa pa nakakuha sa ilang honorarium.

Hinungdan nga nanawagan na karon ang mga kawani sa Commission on Elections (Comelec) office sa Siyudad sa Mandaue sa mga magtutudlo nga niserbisyo atol sa piniliay niadtong Mayo 13 nga ipakubra na ang ilang allowance.

Sa kapin 1,400 ka mga magtutudlo sa Siyduad sa Mandaue nga niserbisyo isip electoral board ug support staff niadtong election, aduna gihapon 10 posyento kanila ang wa nakakubra.

Ang Mandaue City Comelec sa tanang Comelec offices sa Central Visayas ang una unta nga nipagawas sa honorarium sa mga magtutudlo niadtong Byernes, Mayo 17, upat ka adlaw human sa piniliay.

Gihimo nila nga kada barangay sa matag oras ang pagpakubra, gikan sa alas 8 sa buntag hangtud sa alas 6 sa gabii.

Bisan niadtong Sabado abli sila alang sa mga mokuha sa honorarium.

Natapos ang schedule sa mga mokuha Martes, Mayo 21. ug nasuta nga aduna pay wala nakakuha.

Awhag ni Evelyn Cueva, assistant election officer, nga unta di na maabtan pa og Hunyo, kubrahon na kini sa mga magtutudlo.

“Mohatag ta bisan kutob sa Mayo 31, kay ipa-liquidate man gud ni. Kwarta baya ni sa gobyerno. Kon wala gikobra, ipabalik ni sa national office,” pagpahinumdom ni Cueva pinaagi sa Superbalita Cebu.

Usa sa gilantawan nga rason kon ngano adunay pipila nga wala pa kakuha, kay ang uban adunay gitambungan nga seminar.

Ang uban ang nipahimulos sa kahigayunan nga maka-bakasyon una kay usa ka semana nalang abli na sab sa klase.

Ang uban usab naanad kaniadto nga human pa sa usa o duha ka semana human ang piniliay una madawat ang honorarium.

Giklaro usab sa Comelec nga di mahimo nga laing tawo ang pakuhaon sa honorarium.

Ang buhatan sa Comelec sa Mandaue abli hinuon alas 8 sa buntag hangtud sa alas 6 sa gabii, Lunes hangtud sa Sabado.