Pangrakrak sa San Fernando way kalabotan sa eleksiyon

Way labot sa eleksiyon ang pagpangrakrak sa lungsod sa San Fernando, habagatang Sugbo sa tungang gabii sa Lunes, Mayo 9, 2022.

Nitumaw sa imbestigasiyon sa kapulisan, pinangulohan sa ilang hepe, Police Major Efren de la Cruz Diaz, nga usa lang ka “isolated shooting incident” ang pangrakrak sa sityo Baysa, Barangay Panadtaran.

Wa pa sab silay matumbok nga mga suspek.

“Nega pa for the suspects and victims,” matod ni Diaz sa interbyu sa mga tigbalita sa Lunes, Mayo 9, 2022.

Sila si Diaz ug iyang mga sakop ningresponde sa alarma sa mga buto sa pusil sa nahisgutang dapit.

Sa imbestigasiyon, dunay tulo ka sports utility vehicles (SUVs) nga nangabot sa dapit sa wa pa ang pagpamusil.

Paglabay sa pipila ka minutos, duna dayoy nadungog nga mga buto sa armas ang mga lumolupyo.

Ilang nakita nga nanggawas ang mga sakay sa tulo ka mga sakyanan ug nag-iyahay sa pagpanagan sa nagkadaiyang mga direksiyon.

Matod ni Diaz nga sa ilang pag-abot sa dapit, duha na lang ka mga sakyanan ang ilang naabtan nga gilangkuban sa puti nga Nissan Navara (GCS 1894) ug itom nga Toyota Fortuner (3493).

Ang Fortuner dunay daghang buslot agi sa pinusilan.

Wa na silay naabtan bisan usa sa mga sakay sa duha ka mga sakyanan.

Sa pag-abot sa mga personnel sa Scene of the Crime Operations (Soco) nga gipangulohan ni Police Major Jezrhell Cruda sa mga alas 2:50 sa Lunes sa kaadlawon, duna silay nakuhang mga ebidensiya.

Nakuha sila og 13 ka mga kabhang sa nagkadaiyang mga kalibre sa armas, 16 ka mga bala, bala nga nakabuto na ug swab nga dunay dugo.

Sa Lunes sa buntag, wa pay bisan usa ka tawo nga nangangkon nga iyaha ang mao nga mga sakyanan nga gikustodiya sa kapulisan.

Niadtong 2019 elections, ang lungsod giklasipikar sa Commission on Elections (Comelec) nga election hotspot human sa sunodsunod nga pagpamatay sa mga opisiyal sa lungsod, usa niini ang barangay kapitan nga bana ni incumbent re-electionist Lakambini “Neneth” Reluya sa Enero 2019. (BBT, REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph