ALBUERA, Leyte -- Labaw sa Albuera Municipal Environment and Natural Resources Office (MENRO), gibanhigan patay sa riding in tandem pasado alas 6 sa buntag, Biyernes, Oktubre 18, 2019.
Giila ang biktima nga si Zenon Teofilo Granada, 51, taga Albuera Leyte.
Naangol usab ang iyang anak nga si Vincent James Granada, kinsa kauban sa iyang amahan atol sa pagbanhig.
Base sa inisyal nga imbestigasyon, si Granada uban sa iyang anak sakay sa usa ka Toyota Hi Lux nga padung unta sa Ormoc City maghatud sa anak. Nakabiya na sa ilang balay sa H. Barte Street ang mag amahan.
Kalit nga niabot ang duha ka mga tawo sakay sa usa ka motorsiklo.
Ang angkas ang namusil kang Zenon, kinsa nagmaneho sa sakyanan.
Nangabangag ang bildo sa sakyanan agi sa bal ug giingong nakagawas pa si Zenon apan giusban pagpusil.
Nakaangkon og samad sa iyang ulo ug ubang parte sa lawas si Zenon hinungdan sa iyang kamatayon.
Natapsingan usab sa may tiyan ang anak, kinsa gidala sa tambalanan sa Ormoc.
Ang drayber sa motorsiklo giingong nakasinina og green ug nag helmet samtang ang angkas waa mag helmet.
Blangko pa ang kapulisan sa motibo apan ilang gisubay kon basin may kalabutan kini sa trabaho.
Wa pa usay ideya ang kapulisan sa mga responsable sa krimen.
Padayon karon ang ilang imbestigasyon ug nihangyo ang kapulisan sa publiko nga kon dunay nakakita, makigkooperar unta sa kapulisan aron makairog ang ilang pakisusi sa hitabo. (JKDP)