USA ka amahan nga igo lang nakahatod sa iyang anak sud sa eskwelahan, gipusil-patay sa duha ka mga lalake nga nagsakay og motorsiklo sa atubangan sa San Isidro Elementary School sa Barangay San Isidro, dakbayan sa Talisay kagahapon sa buntag, Marso 8.
Giila sa kapulisan ang biktima nga si Jason Narrido, hingkod ug taga Sitio Tiago, Barangay San Isidro.
Usa ka tindera nga nakasaksi sa hitabo niingon nga si Narrido mopalit unta og gulaman ug tempura sa tindahan apan kalit nga niabot ang duha ka mga mamumuno.
Ang nag-angkas maoy ninaog ug giagbayan si Narrido ug nanglakaw apan pag-abot sa unahan, iyang nadungong ang upat ka mga buto sa armas.
Midugang ang saksi nga giingnan pa siya sa drayber sa motorsiklo nga mopadaplin aron dili mapagan.
Human sa hitabo, daling nisibat ang duha sakay gihapon sa motorsiklo.
Ang nagpusil nag-jacket, nagtaptap sa iyang dagway ug nagkawo. Nagsul-ob og yellow nga helmet ang nagmaneho sa motor.
Si PO3 Glenn Besande, imbestigador sa Talisay City Police Station, nibutyag nga sa ulo ug lawas ang samad ni Narrido kinsa namatay dihadiha.
Upat ka kabhang sa wa pa matino nga armas ang nakuha sa kapulisan sa crime scene.
Matod ni Besande, gisubay nila karon ang background ni Narrido aron pagsuta sa motibo sa pagpamusil, laip sa nakita sa motorsiklo niini ang sticker nga logo sa PNP.
Atol sa hitabo, wala dayon sultihi sa kapulisan bahin sa nahitabo sa iyang amahan.