Usa ka paralisado ang nalumos dihang nilabang sa sapa sa Purok Sampaguita, Barangay Tinubdan, lungsod sa San Fernando, alas 9:00 sa buntag Dominggo, Enero 22, 2023.
Si Silverio Alfeche Sasil, 72, ulitawo ug nagpuyo sa nahisgutang lugar, patay na nga napalgan sa iyang kabanay ug mga silingan.
Si Police Senior Master Sgt. Marvin Ando sa San Fernando Police Station nga nahinabi sa SunStar Superbalita Cebu, nagkanayon nga nilakaw ang biktima niadtong Sabado aron moduaw sa iyang mga kabanay.
Sumala ni Ando, ang biktima usa ka paralisado human nadasmagan sa motorsiklo ug maglisod na sa paglakaw.
Dugang ni Ando, nipugos sa paglabang ang biktima sa sapa nga kusog ang sug ug tungod kay maglisod na sa paglakaw, nawad-an sa balanse ug natumba.
Gituohan nga wala na makabangon sa lim-aw sa sapa hinungdan nga nalumos.
Ang kabanay wala na mopa-autopsy sa biktima human kumbinsido kini nga namulos si Sasil ug walay nakitang timailhan sa foul play sa iyang kamatayon. (GPL)