KASONG parricide ang giatubang sa usa ka inahan nga taga-lungsod sa San Remigio human, matod pa, iyang napatay ang iyang anak pinaagi sa pagpanagmal.
Matod sa inahan, di niya tuyo nga patyon ang bata apan nahinaykan niya kini human nagmagahi pag-inoi sa iyang tambal sa hilanat.
Ang San Remigio Police nisang-at sa reklamong parricide batok sa 30-anyos nga inahan nga si Felma Cabataña sa Cebu Provincial Prosecutor’s Office, Enero 3, 2019, human matod pa napatay niya sa pagpamun-og ang iyang 6-anyos nga anak lalake nga si Kent Joseph del Rosario.
Nahitabo ang giingong pagpanagmal niadtong Disyembre 27, 2018 sa Manyo Yolanda sa San Remigio. Gisuwayan sa pagpa-inom sa inahan og tambal sa hilanat ang iyang anak, apan nagdumili, nadapatan kini niya.
Nakahinumdom si Cabataña nga nahapak niya ang nawong, tiyan ug bitiis sa bata, apan wa siya’y intensiyon nga patyon kini. (AZLG)