Nahunlak ang usa ka bahin sa karsada kilid sa nagpadayong konstruksyon sa Patria de Cebu sa Brgy. Sto. Niño, dakbayan sa Sugbo sa Miyerkules sa hapon, Septiyembre 13, 2023.
Daling gisirad-an sa trapiko ang Dalan Legaspi tungod sa risgo sa gibana-bana nga unom ka metros nga gilawmon sa lungag ug nameligro usab ang gitukod nga edipisyo sa dapit.
Si Harold Alcontin, pangulo sa Cebu City Disaster Risk Reduction and Management Office (CCDRRMO), sa pakighinabi sa SunStar Cebu sa Miyerkules, nagkanayon nga base sa ilang inisyal nga assessment nga tubig gikan sa uwan ug humok nga yuta ang hinungdan sa pagkahunlak sa dapit.
“Yuta humok ra kaayo ba, bug-at, plus tubig pa gyud so maoy toy nakaingon collapse sa composite piling,” matod ni Alcontin.
Ang Cebu City Transportation Office (CCTO) nipahibawo nga adunay temporaryong pagsira sa dalan sa Legaspi eskina sa MJ Cuenco Ave. ug Osmeña Blvd., ug Lapu-Lapu tungod sa naguba nga dalan.
Gumikan sa maong insidente, temporaryong ihunong ang construction work sa Patria de Cebu.
Ang Office of the Building Official (OBO) niisyu sa notice of violation sa management sa Patria de Cebu ug Dakay Construction and Development Corp. (DCDC) sa samang adlaw. / RJM, JJL