WALAY nakitang problema si Lapu-Lapu City Congresswoman Paz Radaza sa plano sa National Historical Commission of the Philippines (NHCP) sa pag-ilis sa monumento ni Lapu-Lapu sa Liberty Shrine nga mas dako ug mas daghan ang kuyog niini.
Kini gumikan kay alang sa kongresista dili usab si Lapu-Lapu ang bugtong nakigbatok sa mga Kastila kaniadto.
Matod ni Radaza dili man usab mahimong wala nay bili ang naandang monumento ni Lapu-Lapu karon nga mahimutang sa Liberty Shrine sanglit adto man kini ipahimutang sa usa ka museum nga diha ra usab tukoron duol sa naasoyng lugar.
Wala usab nagpasabot nga gipakagamay ang nabuhat ni Lapu-Lapu sa “Battle of Mactan” kun ugaling ubanan siya ug laing mga personalidad sa bag-ong monumento nga tukoron sa Liberty Shrine.
Tinuod man tuod nga wala gayuy makatumbok nga si Lapu-Lapu ang nakapatay ni Ferdinand Magellan niadtong Abril 27, 1521 apan dili usab malalis nga siya ang lider sa mga Oponganong mibatok sa Kastila mao nga angay usab nga pasidunggan ug handomon ang iyang pagkalider.
Apan angayan usab nga dili ibaliwala ang ubang mga kauban ni Lapu-Lapu nga mabutang sa monumento sanglit usa man kadto ka kalamposan sa tanan nga taga isla sa Macatan ug dili sa usa ka indibidwal. (GCM)