Gimandoan sa Korte Suprema ang Philippine Charity Sweepstakes Office (PCSO) nga bayran si Antonio F. Mendoza, kinsa nakadaog sa Lotto 6/42 draw nga dunay damaged ticket, P12,391,600 isip jackpot prize.
Nipusta si Mendoza kaniadtong Oktubre 2, 2014, apan gikumot sa iyang apo ang nakadaog nga tiket, hinungdan nga gisulayan kini sa iyang anak nga babaye nga tul-iron kini gamit ang plantsa nga nakapaitom niini.
Kini ang hinungdan nga duha lang ka mga numero nga kombinasyon ang makita sa gipustahan, ang outlet diin gipalit ang tiket, ang petsa sa pagpalit, ang petsa sa pagbola ug, partially, ang oras nga gipalit ang tiket.
Gisalikway sa PCSO ang iyang pag-angkon sa premyo, nga giingon nga ang iyang tiket nadaot ug dili ma-validate.
Apan human sa pipila ka mga pagdungog, ang House of Representatives Committee on Games and Amusements mirekomendar sa paghatag sa premyo ngadto kang Mendoza human mapamatud-an sa ebidensya ang iyang pagpanag-iya sa nakadaog nga tiket.
Wala matarug ang PCSO hinungdan nga nipasaka og reklamo si Mendoza.
Ang Regional Trial Court (RTC) sa Balayan, Batangas mihukom pabor kaniya, nga nag-ingon nga ang kadaot sa tiket makatarunganon sa paggamit sa mga sekondaryang ebidensya.
Gisuportahan sa Court of Appeals (CA) ang kadaugan apan gisalikway ang bayad sa abogado ug mga kadaot nga moral.
Sa 17 ka-panid nga Desisyon nga gisulat ni Associate Justice Jhosep Y. Lopez, ang Ikaduhang Dibisyon sa Korte Suprema nakakaplag og ka way klaro sa PCSO Amended Games and Rules and Regulations para sa Lotto 6/42 Rules, nga mipabor sa interpretasyon ni Mendoza nga ang pagpili sa mga mananaog nga numero maoy labing importante.
Ang PCSO nangatarungan nga ang pagpresentar sa kompletong pisikal nga tiket usa ka kondisyon sa pagbayad sa premyong salapi. / CTL