PDEA fake agents nag-viral, nasikop

MGA SUSPEK: Kini ang manag-uyab nga nagmotor, nagpakaaron-ingnon nga mga ahente sa Philippines Drug Enforcement Agency (PDEA 7) mangrekisa sa maagian apan ilang kuhaon ang mga mahalang mga butang dayong sutoy og padagan sakay sa ilang motorsiklo. / Gikan sa CCPO
MGA SUSPEK: Kini ang manag-uyab nga nagmotor, nagpakaaron-ingnon nga mga ahente sa Philippines Drug Enforcement Agency (PDEA 7) mangrekisa sa maagian apan ilang kuhaon ang mga mahalang mga butang dayong sutoy og padagan sakay sa ilang motorsiklo. / Gikan sa CCPO

Nadakpan na sa mga sakop sa Carbon Police Station sa Cebu City Police Office (CCPO) ang manag-uyab nga nag-viral sa social media nga magpailang sakop sa Philippine Drug Enforcement Agency (PDEA 7) diin ang ilang maagian ilang kapkapan ug kuhaon ang mga mahalong butang.

Ang mga suspek giila nga sila si Jezer Setosta Banzon, alyas Podoy, 42, taga Sitio Greenbelt Drive, Barangay Quiot, dakbayan sa Sugbo ug Erica Jane Pamonag Deluna, alyas Erika, 21, taga Barangay Maribago, dakbayan sa Lapu-Lapu.

Matod ni Police Lieutenant Colonel Janette Rafter, information officer sa CCPO, nga Oktubre 10, 2023, ala 1:00 sa kaadlawon, nakadawat og tawag sa telepono ang Carbon Police Station nga dunay babaye ug lalaki nga sakay sa motorsiklo nga armado.

Dali nga niresponde ang mga polis ug ilang naabtan ang duha sa maong lugar ug ila dayon nga girekisa.

Si Banzon nakuhaan og pusil nga homemade nga .38 kalibre samtang, si Erica nakuhaan usab og homemade nga Black Widow .22 caliber revolver.

GIALARMA

Matod ni Police Miles Damoslog, hepe sa Carbon Police Station, nga sa miaging buwan, gialarma na ang duha sa Barangay Ermita nga mobabag sa mga babaye ug lalaki nga magbaktas, lakip na sa mga motorista ug dayong pagpaila nga PDEA agents.

Sila mangrekisa sa lawas ug kuhaon ang mga butang sama sa cellular phone ug uban pa ug dayong sibat.

Nabantayan na usab sila nga ang ilang mga kinuha nga butang ilang ilatag sa Carbon ug ibaligya.

Tungod niini, gipahugtan dayon sa kapulisan ang ilang pag-monitor sa maong mga personalidad hangtod nga nasigpatan sila nga dunay dala nga armas.

“Naalarma namin yan last month na nagpakilalang law enforcer..,” matod ni Damoslog.

Si Leia Alcantara, information officer sa PDEA 7, nihangop sa pagkasikop sa manag-uyab sanglit ilang ahensya ang gidala sa ilegal nga kalihukan sa duha.

“Mokonsulta sa mi sa among legal kon unsa gyud among i-file nga kaso nilang duha kay amoa baya nga ahensya ang ilang gigamit sa ilang illegal activities,” matod ni Alcantara.

NAKITA SA CCTV

Niadtong Hulyo 30, 2023, si Brian Labrador, hingkod, lumolupyo sa Enriquez Compound sa Barangay Punta Princesa, dakbayan sa Sugbo, nigawas aron magpaibot sa iyang ngipon, pasado alas 11 sa buntag.

Sa dihang nahutdan siya og priority number sa usa ka klinika, nangita siya og laing dentista apan sirado ang kadaghanan nga klinika busa nakahukom siya nga mopauli na lang.

Apan sa iyang pag-abot sa dapit, kalit siya nga girekisa sa mga suspek ug nakuha ang iyang cellphone, bag nga dunay sulod nga P4,900 ug dayong panibat sa duha sakay sa motorsiklo.

Sa ilang pagsibat, nakuhaan ang mga suspek og video sa CCTV sa lugar nga daling gi upload sa barangay kapitan sa Punta Princesa nga dali usab nga nag viral.

Human nailhan ang mga suspek, dali nga gi-follow-up sa mga polis sa Labangon Police Station ug giadto ang mga pinuy-anan niini sa Barangay Quiot apan giingong wala na mopauli.

Dugang ni Rafter nga sa pagkasikop sa manag-uyab daghang mga krimen ang masulbad ilabi na diha sa Barangay Tisa, Labangon ug Punta Princesa, diin kasagaran nangahitabo ang mga reklamo.

ARMADO NASIKOP

Samtang nadakpan sa Guadalupe Police Station ang usa ka lalaki nga nagdala’g armas alas 10:42 sa Dominggo sa gabii, Oktubre 15, 2023 sa Sitio Riverside Banawa, Barangay Guadalupe.

Ang suspek giila sa mga silingan nga si Regie Boy Managaytay Toreno, 30, taga Sitio Nuyoca sa Guadalupe.

Nakuha gikan kaniya ang usa ka kalibre .38 nga revolver ug upat ka mga bala nga kalapasan sa Republic Act 10591 o Comprehensive Firearms and Ammunition Regulation Act ug Comelec gun ban ang atuba­ngong kaso sa mga suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph