Nanawagan ang Provincial Disaster Risk Reduction and Management Office (PDRRMO) sa mga local DRRMOs sa probinsya sa Sugbo nga pahugtan ang pagpangandam sa posibleng epekto sa gibantayan nga bagyo.
Pasiuna nang gipahibawo sa Philippine Atmospheric, Geophysical and Astronomical Services Administration (PAGASA) Mactan nga ang gibantayan nga bagyo posibleng mo-develop ngadto super typhoon nga gibana-bana nga mosulod sa Philippine Area of Responsibility (PAR) sa Biyernes o sa Sabado.
Hinuon, gituohang di kini mo-landfall sa nasod.
Ang bagyo nga dunay international nga ngalang Mawar naa na sa Category 4 nga bagyo base sa US weather forecast ug moigo sa Miyerkules sa Guam.
Tawgon kini og “Betty” kon mosulod na sa PAR sa Pilipinas.
Base sa Public Weather Forecast ug analysis sa Pagasa, wala pa kini direktang epekto sa nasod, apan ang tibuok Visayas kasamtangang makasinati og panagsang mapanganuron ngadto sa madag-umon nga kalangitan inubanan sa pat-ak pat-ak nga pag-ulan o pagpanugdog ug kilat tungod sa Southwesterly Windflow o localized thunderstorms.
Apan si Wilson Ramos, interim officer sa PDRRMO, nagkanayon nga mas maayo nang mangandam og igo samtang padayon pa ang pag-irog sa bagyo.
“We are just waiting sab sa forecast pero ang importante lang nga always prepared ang LGU and LDRRMOs. Nag initial talks na sab nuon sila regarding ana,” matod ni Ramos sa Mayo 23, 2023.
Nipasabot ni Ramos nga bisan kon ugaling way direktang epekto ang bagyo sa Sugbo, dunay mga higayon nga masinati ang pagbunok sa uwan.
Hinungdan nga gusto niyang monitoron pag-ayo sa mga LDRRMO ang mga barangay sa ilang dapit ilabi na kadtong anaa sa mga duol sa sapa ug low-lying areas.
Gihangyo ni Ramos ang mga residente sa probinsya nga makigtambayayong sa mga sakop sa LDRRM offices ug maminaw sa mga pahimangno aron malikay sa mga kakuyaw. (ANV)