GIHANGOP sa hepe sa Cebu Police Provincial Office (CPPO), Police Colonel Engelbert Soriano, ang pagsanong sa tanang kandidato sa nagsingabot nga eleksyon human ningtambong sa makasaysayanong peace covenant signing sa Martes, Marso 22, sa buhatan sa CPPO.
Ang peace covenant gipasiugdahan sa kapulisan, militar, Commision on Elections (Comelec), Department of the Interior and Local Government (DILG) ug ubang mga ahensya sa gobiyerno aron makab-ot ang kahusay ug kalinaw sa adlaw sa piniliay.
Matod ni Soriano, dili ang mga Sugbuanon ang gisaaran sa maong mga politiko kon dili ang Labaw nga Makagagahom diin ilang gipanaad nga motabang sila sa kapulisan nga gawasnon ug luwas ang piniliay.
Giangkon ni Soriano nga adunay mga hulga sa eleksyon hinungdan nga nangandam sila niini sa bisan unsa nga posibling mahitabo .
Wala pa hinuon silay giila nga mga dapit sa lalawigan sa Sugbo nga matawag nga areas of concern sanglit wala pay insidente nga malambigit sa eleksyon gumikan kay wala pa sab magsugod ang kampanya sa lokal nga mga kandidato.
“Sa lahat ng insidente, mag sa-submit lang kami sa Comelec because Comelec has the sole authority to declare an area na watchlist or whatsoever sila ang nag-categorized. So, antayin lang namin..” matod ni Soriano.
Samtang ang kapulisan sa dakbayan sa Sugbo mag-andam nag mga personnel nga maoy mohatag og area security alang sa pagsugod na sa pagpangampanya sa mga lokal nga kandidato sa Biyernes, Marso 25, 2022.