NIABOT na sa 247 ka mga pasahero ang stranded human gikanselar sa Philippine Coast Guard (PCG)-Central Visayas ang pipila ka biyahe sa dagat Dominggo, Enero 20, tungod sa bagyong Amang.
Sa labing uwahi nga datus sa PCG-Central Visayas alas 7 Dominggo sa gabii gikan sa Cebu ug Bohol, niabot sa 247 ang stranded.
Sa notisya nga giluwatan sa Cebu Coast Guard ganinang buntag wala nila tuguti ang biyahe pagawas ug paingon sa Northern Cebu, Eastern Bohol, Southern Leyte, Leyte, Biliran, Samar, ug Eastern Samar sa Visayas.
Samtang lakip usab nga wala na pabiyahi-a ang paingon sa Agusan del Sur ug del Norte, Surigao del Sur ug del Norte, Dinagat Island, ug Camiguin sa Mindanao.
Niabot usab sa 21 ka rolling cargoes, walo ka sakayan, ug 10 usab ka motorbancas ang wala pabiyahea.
Mohimo og anunsiyo ang Coast Guard kon pananglitan nga mamahimo nang makabiyahe ang sakyanang pandagat sa apektado nga dapit.
Samtang ang Bagyong Amang nasigpatan sa 175 kilometros habagatang sidlakan sa Surigao City, Surigao del Norte, alas 4 Dominggo sa hapon.
Sa pagkutlo ning balita, gipanglatawan nga mo-landfall ang maong bagyo sa Siargao Island karong gabii.
Maayo na usab nga panahon ang masinati sa Sugbo tungod kay dili na kini maapektuhan sa bagyo. (HBL)