Ang Philippine Military Academy naa karon dinhi sa Sugbo alang sa ipahigayon nga PMA entrance exam alang niadtong gustong mosulod sa serbisyo isip sundalo sa gobyerno sugod karong adlawa, Septiyembre 10, 2022 ug sa Dominggo Septiyembre 11, 2022 nga ipahigayon sa University of Cebu Maritime Campus sa Mambaling.
Si Army Lieutenant Colonel Lourdes Imperial, usa sa mga opisyal sa PMA, nagkanayon nga kadtong nagpangidaron og 17 ngadto sa 22 anyos nga dunay average nga grado nga 85 porsiento pataas kwalipikado nga maka kuha sa maong pasulit.
Adunay limit sa gitas-on sa mga aplikante nga kinahanglan naka abot sa 5 feet babaye man o lalaki.
Di na nila pangayoan sa vaccination card ang mga examinees sanglit dili na sila estrikto niini apan atol sa pasulit, ipaubos sila sa swab test ug kon magpositibo sila sa kagaw sa coronavirus disease dili sila maka take sa exam.
Sa Cebu City, aduna nay 650 ang mokuha sa maong entrance exam apan mamahimo pa nga makaapas kadtong wala maka rehistro sa online kutob sa alas 10 sa buntag karong adlawa, Septiyembre 10.
Kompletohon lang niini ang mga requirement nga gipangayo kanila ug tugotan na sila nga maka exam.
Wala pay gipahibawo ang Department of National Defense kon pila ang quota sa 2022-2023 nga recruit apan gitug-an ni Imperial nga dili kini molapas sa 350 ka kadete nga maoy naandan matag tuig.
Gipasalig niya nga kon madawat na ang applikante ug makasugod na sa training sa dakbayan sa Baguio libre kini sa tanan nga ginikahanglan niini ug magsugod na usab siya sa pagdawat sa sweldo sa gobyerno.
Gipahibawo usab ni Imperial nga hugot na nga gidili ang maltreatment nga naila nga hazing sa mga kadete sa sulod sa academy sanglit mamahimong matangtang ang naghimo niini.
“The term being used in PMA is not hazing but maltreatment. The academy does not tolerate any form of maltreatment so we do not tolerate, physical man sya, psychological. Cadets found guilty are discharged from the academy and they maybe charged criminally as provided by the anti-hazing law,” matod ni Imperial.
Si Army Major Joe Patrick Martinez, group commander sa 3rd Civil Relations sa Visayas Command, nihatag og tip sa mga examinee nga dili mokompyansa sa ilang mga tubag.
Labing maayo matod niya nga i-review ang ilang mga tubag sanglit mamahimong malipat sila.
Kinahanglan estudyahan ang mga subject nga posibling mogawas sa pasulit sama sa Algebra, Trigonometry, Geometry ug uban pa.
Ang kapulisan sa siyudad sa Sugbo mohatag og siguridad sa UC Mambaling atol sa duha ka mga adlaw nga pasulit, sigun ni Police Lieutenant Colonel Wilbert Parilla.