Ang ebalwasyon nga gihimo sa dagkong mga opisyal sa kapulisan sa tinguha nga limpiyohan ang organisasyon batok sa mga nalambigit sa illegal drugs trade adunay “significant impact,” matod ni Baguio City Mayor Benjamin Magalong.
Sa pakighinabi sa mga tigbalita, si Magalong, kinsa sakop sa five-man advisory council nga nagpahigayon sa assessment, niingon nga 95 porsiyento na sila nga nahuman.
“Malaki na accomplish namin. Marami rin kaming nalaman...Sabihin ko na lang significant, malaking bagay itong nangyari na ito. Malaking impact ito sa PNP. Positive impact,” matod niya.
Niadtong Enero, si Interior and Local Government Secretary Benhur Abalos Jr. nanawagan sa mga full-fledged police colonels ug generals nga mosumiter sa ilang courtesy resignation taliwala sa gipakusog nga internal cleansing, ilabina batok sa mga nalambigit sa illegal drugs trade.
Ang lakang ni Abalos naggumikan sa pagkasikop ni Police Master Sergeant Rodolfo Mayo Jr. atol sa drug operation sa Manila niadtong Oktubre 2022, nga nakuhaan og kapin sa usa ka toneladang shabu.
Matod niya nga human sa pagkasikop ni Mayo, kinsa gitaktak sa serbisyo sa kapulisan niadtong Marso, ilang nasuta nga adunay mas dakong kasamok sa organisasyon sa kapulisan nga usa sa mga ahensya sa gobiyerno nga nag-una nga nalambigit sa pagsulbad sa hulga sa drugas tungod kay ang uban kanila nalambigit sa ilegal nga kalihukan.
Ang ubang mga sakop sa komite mao sila si Philippine National Police (PNP) chief General Rodolfo Azurin Jr., kanhi Defense secretary Gilberto Teodoro, kanhi Court of Appeals justice Melchor Sadang ug retired police general Isagani Nerez.
“We are now currently wrapping up. The President is already asking about it and I said it would be finished in two weeks,” ingon ni Magalong.
Matod niya nga tipik sa mga dokumento nga isumite ngadto sa Presidente mao ang mga rekomendasyon sa mga polisiya aron matubag ang pagkalambigit sa mga pulis sa ilegal nga drugas. (TPM sa SunStar Philippines)