PAGSUMPO sa ugat sa ilegal nga drugas, kriminalidad ug pagdisiplina sa mga pulis nga badlungon sa katilingban ang patutukan sa bag-ong hepe sa Police Regional Office 7, Police Brigadier General Valeriano De Leon.
Atol sa turnover of command sa PRO 7 diin gihulipan si Police Brigadier General Debold Sinas nga mao nay pangulo sa National Capital Region Police Office, nibahad si De Leon sa scalawag nga mga pulis nga wa silay luna sa Central Visayas.
Iyang unahon sa pagsusi ang mga kaso sa mga pulis nga naa sa buhatan sa Regional Internal Affairs Service tungod kay di siya makasugod sa kampanya sa gubat batok sa illegal nga drugas kon sa sulod mismo sa PRO 7 adunay problema.
Mihulagway si De Leon sa iyang kaugalingon nga panagsa ra masuko, apan ang iyang aksyon sakit pa itandi sa resulta sa nasuko.
“Bihira akong magalit kung totoosin pero yung action ko, mas masakit pa sa magalit. I do not know how to interpret that but ganun lang ako.Kung hindi kita madaanan sa tingin, sa pakiusap sa papel and probably beyond that,” butyag ni De Leon.
Si De Leon sakop sa Philippine Military Academy Class of 1989. Nahimo siya nga deputy regional director for operation sa Police Regional Office 11 niadtong 2016.
Natudlo siyang provincial director sa Davao Oriental Provincial Police Office ug acting city director sa Davao City Police Office sa dihang nahitabo ang pag-ulbo sa bomba sa usa ka night market sa dakbayan diin adunay kinabuhi ang nakalas.
Ang katapusan niyang assignment mao ang Firearms Explosives Office sa Camp Crame sulod sa duha ka tuig, diin iyang giduso ang sugyot nga hatagan og lima ka tuig nga expiration ang lisensya sa mga gun holder.
Si Sinas nisaad kang De Leon nga moabag sa pagsumpo sa illegal nga drugas sa rehiyon 7 pinaagi sa pagbinayloay sa mga kasayuran labot sa nagpayuhot sa illegal nga drugas gikan sa Metro Manila. Kasagaran sa drugas nga nasakmit sa Sugbo nagagikan sa kaulohan.
“Kasi katong naa mi diri pag nang raid mi, moingon nga ang source toa didto ang pangalan, toa didto. So, kami permi mi makakuhag info, wala may reaction. So karon, akong gi-estoryahan nga i-merge nato (De Leon) ang info,” matod ni Sinas.
Dugang ni Sinas nga ila usab pahibaw-on ang PRO 7 kon adunay impormasyon nga adunay drugas nga mosulod sa Central Visayas.