USA ka poultry farm sa dakbayan sa Talisay ang gipasirad-an alas 11 Martes sa buntag, Disyembe 17, human kini wala gyud nipatuo sa gihatag nga usa ka tuig nga pagkuha sa ilang business permit.
Ang poulty farm nga iya sa usa ka Shu Jia Chen, nga nahimutang sa Sitio Libo, barangay Mohon, dakbayan sa Talisay, ang gipadad-an og notisya pagpahunong sa ilang operasyon sa personnel sa Talisay City Legal Office (TCLO).
Matod ni Atty. Giovanni Sususco, City Legal officer, nga gitawag ang atensyon sa maong poultry farm kay walay permit ug sa kalapasan niini sa usa sa mga ordinansa sa siyudad.
Gipasabot ni Susuco nga gikan sa agricultural area, nausab na ang zoning niini ngadto na sa residential hinungdan nga dili angay nga anaa sa maong lugar ang poultry farm.
“Primary basis gyud sa closure sa Libo poultry farm kay wala silay business permit, wala gyud sila ni-comply, prior ana, gi-notify na ni sila, nga na-change na ang zoning anang lugara from agricultural to residential, gitagaan sila‘g 1 year to find another place para sa ilang business,” pagpasabot ni Sususco.
Dugang sa City legal officer nga gihatagan pa gani nila kini og show cause order apan wala gihapon kini maka-comply, hinungdan nga gipadad-an na gyud kini og closure order Martes sa buntag.
Gawas nga walay permit, nakadawat usab ang City hall og reklamo sa mga silingang’ kabalayan sa poultry sa kabaho niini.
Atol sa pag-serve sa maong order, igo lang gipasud ang usa sa mga kawani sa City hall, apan walay bisan usa nga niatubang sa mga sakop sa media aron pagpadangat sa ilang side.
Gipaskinan usab ug tarpaulin ang gawas nga bahin sa maong farm, pagpahibalo sa publiko nga dili na gyud mahimo nga maka-operate pa ang maong poultry farm. (FMD)