Gidepensahan sa PrimeWater Infrastructure Corporation ang ilang kaugalingon, namahayag nga wala silay labot sa panagbingkil sa labing taas nga mga opisyal sa Board of Directors (BOD) sa Metropolitan Cebu Water District (MCWD) ug sa mayor sa dakbayan sa Sugbo.
Ang PrimeWater nagkanayon nga igo lang sila nga nitanyag alang sa pagpalambo pa sa serbisyo sa water district alang sa minilyon ka mga tawo sa walo ka local governments unit ilawom sa franchise area niini.
“Prime is out of the feud between the two personalities. I’m sure there are other companies who can offer their services to the city, “ tipik sa opisyal nga pamahayag sa PrimeWater.
Si Mayor Michael Rama, niadtong ikaduhang semana sa Mayo, gusto nga pahulipan isip chairman si Atty. Jose Daluz III.
Si Daluz nagtuo nga usa sa mga hinungdan kon nganong siya gusto pahulipan ni Rama sanglit gibalibaran sa BOD sa MCWD ang tanyag nga ‘overall takeover’ sa operasyon sa water district.
Matod sa PrimeWater, ilang misyon mao ang pagtubag sa mga panginahanglan sa seguridad sa tubig sa mga lokal nga komunidad sa tibuok nasod pinaagi sa pagtinguha sa malungtarong pakigtambayayong nga makabenipisyo sa duha ka mga habig ug sa ubang stakeholders.
Gumikan niini, sila padayon nga nakiglambigit sa mga diskusyon uban sa mga local government unit (LGU) ug local water districts aron masusi kon adunay mga paagi diin ang kompaniya mahimong makatampo ug makapauswag sa mga sistema sa suplay sa tubig sulod sa ilang mga hurisdiksyon.
Ang PrimeWater team nipresentar ngadto kang Rama ug sa tulo ka mga sakop sa BOD niadtong ikaduhang semana sa Pebrero sa ilang mga kredensyal uban ang tumong sa pagsugod sa mga diskusyon alang sa pagtinguha sa potensyal nga hiniusang kalamboan alang sa mga kinahanglanon sa seguridad sa tubig sa siyudad.
Matod nila nga nagpadala sila og letter of intent ngadto sa MCWD isip standard operating procedure (SOP) sa panghinaot nga mahatagan og dugang data ug impormasyon aron sila makasugod sa ilang angay buhaton base sa ilang diskusyon.
Gipasabot nila nga ang public-private partnerships (PPP) naglakip sa hiniusang pagpalambo sa water distribution ug supply systems pinaagi sa joint venture uban sa kasamtangan nga stakeholders, ma-local government unit (LGU) man o local water district.
Apil sa ilang mandato ubos sa hiniusang mga inisyatibo sa pagpalambo ang ilang paggasto aron sa pagtukod, pagpalambo ug pag-operate sa kritikal nga mga imprastraktura aron suportahan, madugangan ug mapalambo ang kasamtangan nga mga pasilidad sa water district.