Police Regional Office nagsugod na sa ilang inventory sa mga lugar nga posibling ipaubos sa areas of concern ug hot spots ning nagkaduol na ang Barangay and Sangguniang Kabataan Elections (SBKE) sa Oktubre 2023.
Aron matuki kini, magtagbo ang composite team sa Commission on Elections (Comelec), Philippine National Police (PNP) ug Armadong Kusog sa Pilipinas alang sa umolon nga Regional Joint Security Control Center.
Matod ni Police Lieutenant Colonel Gerard Ace Pelare, spokesperson ni PRO 7 Director Police Brigadier General Anthony Aberin, nga sa pagkakaron gipangsusi pa ang mga dapit diin posibling moulbo ang kagubot atol sa nagsingabot nga piniliay sa barangay.
Nagtuo si Pelare nga sa mosunod nga mga buwan, magsugod na ang security plan sa PNP ug magpadayon na hangtod nga duol na lang ang eleksyon.
Sa pagkakaron, ang usa sa mga dapit nga sigurado nga patutukan ni Aberin mao ang Negros Oriental tungod sa mga insidente nga nahitabo sa milabay nga buwan diin ang gobernador sa probinsya namatay sa massacre ug niangin pa og laing mga kinabuhi.
“Of course, Negros is one of the priority areas considering the development in the area weeks ago,” matod ni Pelare.
Una nang nimando si Aberin sa tanang chief of police sa mga siyudad ug lalawigan sa Central Visayas nga monitoron ang tanang mga barangay sa ilang jurisdiction aron malikayan ang kagubot.
Niadtong Marso 14, 2023 gibanhigan patay ang kapitan sa Manguiao, lungsod sa Asturias nga niangin usab sa asawa niini samtang nagsakay sa ilang motorsiklo.
Ang mga biktima mao silang Mario ug Edna Tundag, nga gikan pa sa usa ka lungsod ug sa ilang pagpauli gisundan sa riding in tandem.
Pag-abot sa atubangan sa Asturias Central Elementary School sa Barangay Poblacion, sila gipamusil sa riding in tandem.
Kining mao nga mga panghitabo patutokan sa kapulisan kon kini may kalabutan ba sa dagan sa politika sa ilang barangay o personal nga atraso ang hinungdan niini.