POLICE Regional Office (PRO) Central Visayas mo-monitor sa migawas nga impormasyon nga mibalik na usab sa giingong kalambigitan sa ilegal nga drugas ni kanhi heneral ug kanhi Daanbantayan mayor Vicente Loot human sa taas nga panahon nga wala na kini magpakita sa publiko.
Ning bag-o lang gibirahan na usab ni Presidente Rodrigo Duterte si Loot labot sa kalambigitan niini sa ilegal nga drugas ug gipangutana pa nganong hangtod karon buhi pa kini.
Si PRO Central Visayas Director Police Brigadier General Debold Sinas mipahibawo nga ang presidente nakadawat na usab matud pa og impormasyon nga mibalik na usab sa ilegal nga kalihukan ang kanhi mayor.
Gipasusi na sa heneral pinaagi sa iyang mga intelligence officer kon unsa katinuod ang nadawat sa presidente nga impormasyon.
“Usa sa gisuspetsahan napud niya is basig naa napo'y report nga nadawat si presidente nga active napud si ex-mayor Loot. We'll be checking our intel (intelligence unit) kay dugay-dugay siya nawala. Usa gyud sa gikuan ni Mayor (President Duterte) basin mamalik napud ang droga diri and he suspected that Loot might be a hand,” matud ni Sinas.
Gipasabot sa heneral nga nagduda lang ang presidente sa posibling kalambigitan ni Loot sa ilegal nga drugas sa Central Visayas karon.
Wala na modugang pa si Sinas kon unsa pa ang ilang gipanghimo labot sa monitoring sa giingong kalambigitan ni Loot nga kanhi usab dakong opisyal sa kapulisan sa Central Visayas.
“No comment sa mi sa mga whatever operations and investigations kay Loot. We'll be conferring sa mga pronouncement sa presidente,” dugang ni Sinas.
Una nang namasangil si Mayor Loot nga gibanhigan siya sa milabay nga tuig apan nakaluwas ug bisan gamay wala kini masamad sa giingong pag-ambush kaniya.
Sukad niadto wala na mopakita ang mayor sa publiko ug ang iyang bise mayor na ang kanunay nga mopatim-aw sa mga miting uban sa kapulisan sa lungsod sa Daanbantayan. (Superbalita Cebu)