Nagmalampuson ang ‘Project Ligid’ nga gipasiugdahan sa Carcar City Police Station niadtong Lunes, Mayo 8 nga gipahigayon sa Plaza, dakbayan sa Carcar.
Gipangulohan ni Police Lt. Col. Ardioleto Cabagnot, hepe sa Carcar City Police Station, ang kalihukan uban ni Mayor Patrick Barcenas ug mga opisyal sa dakbayan sa Carcar.
Ang maong kalihukan adunay tema nga: “Ligid Mo, Panindoton Ko.”
Matod pa ni Cabagnot sa dihang nahinabi sa DYSS Super Radyo GMA Cebu nga ang kalihukan gitumong isip kabahin sa tampo sa kapulisan pagpanalipod sa kalikupan.
Inay nga ilabay ang gubaong mga ligid, mapuslan pa kini pinaagi sa pag-recycle niini.
Ang mga ligid gihimong mga dapat sa lainlaing gidesinyong mga gamit, sama sa lingkuranan ug uban pa.
Ang mga partisipante sa proyekto mao ang mga personnel sa Carcar City Police Station.
Ang napiling mga mananaog mao ang Team 7 - 1st place nga maoy nakakuha sa P5,000 nga premyo, gisundan sa Team 5 sa ganti nga P4,000 ug Team 6 sa premyo nga P3,000.
Ang ubang partisipante nga wa nakasulod sa Top 3 nakadawat og consolation prize nga P500. (GPL)