MAKABALIK na sa pagdagan ang mga traditional public utility jeepneys (TPUJs) sa tanang lugar sa Central Visayas, gawas sa Cebu City ug Mandaue City.
Gipasalig ni Eduardo Montealto, Jr., direktor sa Land Transportation Franchising and Regulatory Board (LTFRB) 7, nga bisan di pa tugutan ang TPUJs sa duha ka mga siyudad, ilang pun-an ang gidahanon sa gipadagan nga mga bus ug modernong mga PUJ (MPUJs) sa Siyudad sa Sugbo ug Mandaue.
Sa southern Cebu City, nagsugod na pagdagan ang 10 ka mga MPUJs nga manukad sa Quiot Pardo padung sa Ayala Center ug Quiot Pardo padung sa SM City Cebu.
Ang pagdugang gitumong aron makasakay ang dugang mga pasahero nunot sa pag-downgrade sa status sa tibuok rehiyon ngadto sa modified general community quarantine (MGCQ) status hangtod Septiyembre 30, 2020.
“Tan-aw, pun-an gyod kay ning daghan-daghan man pod ang atong gi-open nga mga establishments, pero dili pa g’yod nga ning back g’yod nga lagpas pa sa 50 percent,” matod niya.
Sigun ni Montealto nga aduna gihapoy hulga sa Covid-19, labi na sa Syudad sa Sugbo, nga na konsiderar isip Covid-19 hotspot, bisan kon nag MGCQ na ang tibuok rehiyon.
“Kinahanglan pod natong i-maintain ang ato paubos pa g’yod. Atong gikabalak-an kay basin mosaka na pod unya ba og kalit kay ang Cebu City baya maoy hot area sa una. Manghinaot ta nga dili pa gyod siya motaas,” dugang ni Montealto.
Nagkanayon usab si Montealto nga usa sa mga rason ngano nga wa gihapon gitugutan nga modagan pagbalik ang TPUJs sa duha ka mga siyudad kay aduna pa ma’y igo nga suplay sa bus ug MPUJs nga pwede padaganon kon magkuwang ang transportasyon.
Ubos sa Omnibus Guidelines nga gisunod sa LTFRB 7 alang sa public transportation samtang naa sa panahon sa pandemya, pabalikon lamang pagpadagan ang mga TPUJs kon nahurot na pagpadagan ang mga bus ug MPUJs.
Matod niya nga kon itandi sa Lapu-Lapu City, mas daghan g’ang mga bus ug MPUJs nga na-issuehan og special permit aron maka operate sa Cebu City ug Mandaue City.
Kon sa sulod lang sa Cebu City, matod niya adunay 192 ka mga bus ug MPUJs nga nagdagan na.
“Duna’y gikan sa North (Cebu), duna’y molahos diri nga 23 (buses) kabuok. Sa South dunay, 36,” matod ni Montealto.
Matod ni Montealto, aduna sila’y umaabot nga coordination meeting tali sa Cebu City ug transport sectors aron paghisgot kon unsa pa nga mga rota ang angay nang ablihan ug ibutang ang dugang mga bus ug MPUJs.
Kini nga mga rota, matod niya, subay na sa Local Public Transport Route Plan sa Cebu City.
Positibo si Montealto nga makabalik ra gihapon ang TPUJs sa Cebu City ug Mandaue City, labi na kon itugot na pagbalik ang crossing of borders sa Cebu Province, Dumaguete, ug Bacolod.
“Kon anang panahona mo-open na na, which is mao nay among gipaningkamutan karon, nga nag-coordinate mi sa Probinsiya kanus-a sila mag open,” sigun niya.
MPUJs
Nagsugod na pagdagan ang 10 ka mga modern public utility jeepneys (MPUJs) nga gi-operate sa El Pardo Transport Cooperative.
Ang maong mga modern jeep nagsugod pagdagan niadtong Martes, Septiyembre 1, atol sa pagsugod sa modified general community quarantine (MGCQ).
Matod ni LTFRB 7 Assistant Regional Director Reynaldo Elnar nga kining mga unit airconditioned ug aduna’y 22 ka pasahero ang makasakay.
Matod ni Elnar, anaa sa P11 ang pletehan sa maong mga modern jeep alang sa unang upat ka kilometros ug P1.80 sa mosunod nga mga kilometro. /
Base sa El Pardo Transport Cooperative, moagi sa Tres de Abril, V. Rama, B. Rodriguez, ug Mango & V.V. ang rota sa Quiot Pardo-Ayala.
Samtang moagi sa Tres de Abril, San Carlos, Robinsons Gallery & V.V. alang sa rota sa Quiot Pardo-SM City Cebu. (WBS, HBL)