GIBAWIAN na sa iyang armas ug chapa ang pulis nga gipasanginlan nga nanglugos sa pag-umangkon sa asawa niini niadtong miaging buwan samtang magpadayon ang imbestigasyon.
Nisumbong sa Abellana police station 2 si Jenny, 20, nga gilugos siya sa pulis niadtong Mayo 14, apan nasuta nga nalipat lang ang dalaga sa petsa sanglit nahitabo kini niadtong Mayo 15 sa gabii.
Si Sr. Supt. Joel Doria, hepe sa Cebu City Police Office, nimando dayon sa iyang imbestigador pagtino kon unsa kini ka tinuod.
Sa dihang nasayran sa CCPO director, iya dayon nga gimandoan ang hepe sa Investigation and Detective Management Branch sa CCPO nga si Supt. Ryan Devaras nga pahulipan ang maong pulis nga nagrango pag Police Officer 2.
Ang maong pulis kasamtangan nga gibutang sa Police Holding Accounting Unit sa CCPO.
Dako ang purohan, matod ni Doria, nga mataktak sa serbisyo ang maong pulis kon mamatud-an nga nahimo niya ang salaod ug mag atubang pag kasong kriminal.
"On going yung investigation. Well, kon totoo yung insidente, dapat panagutan niya. Kailangan nating i-file yung case," matod ni Doria.
Alang kang Doria nga di siya makatugot nga dunay pulis nga makasugat og kasong pagpanglugos.
Ilabi na nga ang biktima pag umangkon pa sa asawa niini nga daw sa adunay kamatuoran.
Niadtong Mayo 15, di Mayo 14, giingong unang gihilabtan si Jenny sulod sa balay sa suspek samtang wa ang asawa niini.
Apan niadtong Dominggo, Hunyo 3, subli na untang hilabtan si Jenny, apan matod niya nibalibad na siya ug ang dughan nalang niini maoy giingong gikumot-kumot sa pulus.
Tungod sa kakusog sa pagkumot, nakaangkon og lagom ang iyang duha ka mga dughan.
Ang dalaga unang nidangop sa Abellana Police Station inabagan sa usa ka kabanay niadtong Huwebes sa buntag. (AYB)