Dili lang upat, kon dili, kapin sa 10 ka mga sakop sa Tau Gamma Phi fraternity and sorority ang nisalmot sa pag hazing sa usa ka tinun-an sa University of Cebu-Maritime Education and Training Center (UC-METC) nga niresulta sa kamatayon niini niadtong Disyembre 2022.
Unang ningtahan sa Cebu City Police Office ang upat ka mga miyembro sa Tau Gamma niadtong Huwebes human sila gilambigit sa kamatayon ni Ronnel Masamoc Baguio niadtong Disyembre 19, 2022.
Matod ni Police Lieutenant Colonel Maria Theresa Macatangay, hepe sa Investigation and Detective Management Branch (IDMB) sa CCPO nga dunay bag-ong kalamboan human nadugangan og laing saksi.
Ang saksi nibutyag nga dili moubos sa napulo ang ningbunal-bunal sa tulo ka mga neophyte, usa kanila si Baguio.
Sa kapin sa napulo nga ningsalmot sa initiation, unom kanila ang nailhan na ang mga ngalan, lakip na niini ang upat nga ning-surrender nga dunay mga ranggo sa Tau Gamma sama sa Grand Triskelion, duha ka deputy Triskelion ug master initiator (MI).
Bisan og ila nang nailhan ang mga suspek, dili pa nila mapasaka karong semanaha ang kaso sanglit nagpadayon pa sila sa pagkuha og dugang nga mga ebidensya uban sa Public Attorney’s Office (PAO).
“Latest update, we have identified another witness thereby raising the number of witnesses to 6 and also recent updates again there are 3 initiates that actually participated in the actual event, not just two. So, all these are still part of ongoing investigation and we will not yet file the case until we are fully assured that we have already collected the necessary competent and relevant pieces of evidence,” matod ni Macatangay.
Dugang ni Macatangay nga nahibaw-an nila atol sa pagtumaw sa laing saksi nga dili lang duha ang gi hazing sa Tau Gamma kon dili tulo diay, sukwahi sa unang nigawas sa impormasyon.
Usa kanila nilagda na og pinanumpaang pamahayag ug nipasalig nga andam siya nga motabang sa kapulisan isip saksi alang na unya sa pagpasaka sa kaso sa korte.
Dili pa usab makonsiderar nga sulbad na ang maong kaso kon dili pa nila mapasaka ang kaso ngadto sa korte.
Dugang ni Macatangay nga person of interest pa gihapon ang magtutudlo apan mamahimo gihapon siya nga mapasakaan og kaso kon masuta nga duna siyay tulubagon sa balaod bisan kon siya lang ang ni-recruit kang Baguio nga mosulod sa ilang organisasyon.