GITUOHANG nakatulog samtang nagmaneho ang namatay nga pulis nga nabangga sa center island samtang nagmaneho sa awto ug dayon nabanggaan sa usa ka truck van sa N. Bacalso Avenue, Barangay Linao, Dakbayan sa Talisay, pasado alas 11 sa gabii sa Dominggo, Enero 31, 2021.
Si Police Lieutenant Roberto Barnido, deputy station commander sa Talisay City Police Station, niila sa pulis nga si Police Staff Sergeant Lito Niño Dahili, 40, taga Taytay, Dakbayan sa Danao.
Sa imbestigasyon sa Traffic Section sa Talisay City Police Station, si Dahili sakay sa iyang Honda Civic gikan sa Dakbayan sa Carcar aron maghatod og dokumento sa Cebu Provincial Detention and Rehabilitation Center (CPDRC) sa Barangay Kalunasan, Dakbayan sa Sugbo.
Sa kalit lang, nawad-an og kontrol sa sakyanan si Dahili ug nibangga sa concrete center barrier dayon nitabok sa pikas habig sa karsada.
Naatol usab sa pag-agi sa usa ka truck van nga gimaneho ni Lucio Rolan Arida, 51, taga sityo Lower, Kalunasan ug nabanggaan ug nadaro og pipila ka metros.
Namatay diha-diha si si Dahili tungod sa impact samtang si Arida gikustodiya sa kapulisan sa Dakbayan sa Talisay.
NAAKSIDENTE
Samtang nangaangol ang duha ka mga manag-agaw nga nagmotorsiklo sa kaadlawon, Pebrero 1, 2021 sa dan Sabellano, Barangay Basak Pardo, Dakbayan sa Sugbo.
Giila ni Police Staff Sergeant Stephen Sefuesca, deputy investigator sa Labangon Police Station, niila sa manag-agaw nga sila si Charles Jay Limbaga, drayber ug si Angelo Limbaga, 18, pulos taga Sityo Upper Laguna, Barangay Bask Pardo.
Matod ni Sufuesca nga posibleng nakainom ang duha tungod kay nanimaho pa og ilimnong makahubog dihang nmiresponde ang mga sakop sa medical personnel ug Traffic Patrol Group.
Giingon nga niikis-ikis ang motorsiklo dayon nibangga sa poste ug nangalabay ang mga Limbaga.
Si Rolando Limbaga, amahan ni Angelo, niingon nga ang iyang anak dunay buak sa tuo nga nawong base sa resulta sa CT scan.
Nagpasalamat siya nga wa magrabehi og maayo sa angol ang iyang anak.
Kapistahan sa ilang dapit hinungdan nga ang iyang anak nisuroy, apan naaksidente na hinuon.