GIKUMPIRMAR na sa hepe sa Criminal Investigation Detection Unit sa Quezon City Police District nga si Police Major Elmer Monsalve nga ang gipusil-patay sa dalan Borromeo corner Mother Ignacia Stree, Barangay South Triangle, Quezon City mao ang self-confessed drug lord Franz Sabalones.
Alas 11:45 kaganihang buntag ang nagpailang kabanay ni Sabalones nga si Joselito Cabilao usa ka beautician nga taga Pasay City and mi-claim sa patay'ng lawas ni Sabalones.
Gihatag niya ang kompletong pangalan niini nga si Franz Cabilao Sabalones nga taga lungsod sa San Fernando, Cebu.
Lima ka identification cards ang nakuha sa mga pulis sa bag ni Sabalones nga adunay lain-laing mga pangalan.
Una siya nga giila nga si Jerome Cabilao alyas Abdulyakin Tating Limpasan nga nagpuyo sa Calle Zaragosa Castillo Classic, BF Resort Villages, Talin Dos, Las Piñas City.
Nahitabo ang pagpamusil alas 12:08 sa tungang gabii niadtong Miyerkules Santo, Abril 18 sa dihang paingon na kini nga mosulod sa usa ka bilyaran.
Matud ni Monsalve nga kalit kaayo ang hitabo nga bisan ang mga kauban ni Sabalones wala makakita sa pagpamusil.
"Walang maka pagsabi kasi busy ang mga tao dahil may tournament sa billiard puro nakatutok doon sa loob," pamahayag sa hepe.
Adunay kauban si Sabalones nianang orasa sa gawas apan wala usab kini makakita sa gunman tungod kay aduna kini matud pa gikatext sa cellular phone.
Gituohan sa kapulisan nga shot gun ang gigamit sa pagpusil tumong sa ulo nga miresulta sa pagkabuak sa iyang bagol-bagul.
Nakakuha og ID ang kapulisan nga adunay hulagway ni Sabalones apan nakapangalan kini ni Jerome Cabilao isip usa ka pastor sa Reform Adventist Church.
Wala pa masayri sa QCPD kon dalhon ba ang patay'ng lawas ni Sabalones sa Sugbo.
Usa sa mga kasaligang tinubdan sa Superbalita Cebu didto sa kaulohaan nga dili magapahingalan niingong sa Las Piñas na nagpuyo si Sabalones human gibuhian sa Camp Crame.
Nagtago usab si Sabalones sa Misamis Occidental ug giingong milarga kini paingon sa Malaysia agi sa Mindanao.
Pag abot niya sa Manila, giingong nagpadayon gihapon kini sa iligal nga negosyo.