‘Pusher’ mihilak kay sa prisuhan nag-birthday

Pwerteng hilak sa usa ka 41-anyos nga lalaki nga nagsaulog sa iyang adlaw nga natawhan sa Hunyo 9, 2023 human siya nadakpan sa buy-bust sa kapulisan sa dakbayan sa Mandaue.

Gikantahan og happy birthday sa iyang mga kauban sa selda sa Station 5 sa Mandaue City Police Office (MCPO) ang suspek nga si Alvin Serafin Araneta, alyas Ego, ulitawo, taga Zone Talong, Brgy. Paknaan, Mandaue City.

Nakapasamot kini sa iyang pagka emosyonal kay inay maglipaylipay, bilanggoan ang iyang gisangkoan. Si Araneta nadakpan nila ni Police Capt. Waldo Batad sa buy-bust sa mga alas 2:28 sa kaadlawon sa Biyernes sa Purok Tambis, Brgy. Umapad, Mandaue City.

Siya nakuhaan og mga tunga sa kilo sa gituohang shabu nga dunay street drug price (SDP) nga P3.4 milyunes.

Naa siya gitanggong sa custodial facility sa Station 5 samtang giandam ang kasong kalapasan sa Republic Act 9165 kun Comprehensive Dangerous Drugs Act of 2002. (REV)