Ipaagi sa bunotbunot o raffle ang pagpili sa tunghaan nga katulgan sa contingents nga moapil sa Pasigarbo sa Sugbo karong Agusto 2023.
Kini maoy gipahibawo ni Bokal Andrei “Red” Duterte, chairman sa committee on tourism sa Hunta Probinsyal, atol sa nagpadayong preparasyon sa Lalawigan alang sa festival of festivals nga ipahigayon sa dakbayan sa Carcar.
Matod ni Duterte sa Superbalita Cebu sa interbyo pinaagi sa telepuno sa Huwebes, Hulyo 20, nga duna na sila’y listahan sa mga tunghaan nga mahimong magamit sa mga contingent.
Una na nga nipahibaw si Carcar City Mayor Patrick Barcenas nga ila nang giandam ang 23 ka mga tunghaan nga maoy kapasilungan sa mga contingent gikan sa nagkalainlaing lokalidad sa probinsya.
Apan matod ni Duterte nga gawas sa Carcar, ila na usab nga gihangyo ang mga silingang lungsod sa San Fernando ug Sibonga nga mahimong kapuy-an sa mga contingent ugaling magkuwang ang kapasilungan.
“Naa na mi list sa schools sa Carcar. In fact dili lang sa Carcar kay dili man ma-accommodate tanan...In fact karon magbunotay na kon asa sila mo stay, para fair mag draw lots,” matod ni Duterte atol sa pakighinabi sa Superbalita Cebu.
Sa Hulyo 19, 2023 gipangunayan ni Cebu Governor Gwendolyn Garcia ang pagbisita sa mahimong venue sa umaabot nga Pasigarbo sa Sugbo sa Agusto 27, 2023.
Tinguha sa Kagamhanan sa Lalawigan sa Sugbo nga daghan ang makalantaw sa mga pasundayag.
Ang Carcar City Sports Center gibanabana nga maka-accommodate og 7, 000 kon basehan ang bleachers niini.
Gilaraw sa kagamhanan nga pun-an pa ang bleachers nga makaarang og dugang 500 ngadto na sa 1,000.
Lakip sa giandam sa kagamhanan ang stage ug mga gikinahanglan pa nga ayuhon.
“So far, sa atong pag ocular sa Carcar, gamay na lang kaayo ang atong changes, very minimal nga renovation works like sa pintal. Naa man gu’y mga rooms sa taas nga ang mga bildo nangabuak tungod sa Odette unya i-repair,” matod ni Duterte.
“Magdugang mi og mga bleacher...We are looking to rent additional bleachers nga maka-accommodate og additional 500 to 1000 so maximum capacity if ever 8,000 ang capacity,” dugang niya.
Gikatakda usab nga makigtigom ang Kagamhanan sa kapulisan aron masusi kon pila ang gidaghanon sa mga personnel nga i-deploy ingon man ang pakighinabi sa Cebu Electric Cooperative (Cebeco) pagsiguro nga dunay igong supply sa kuryente atol sa kalihukan.
Nanghinaot si Duterte nga sa gihapon, mahimong “trendsetter” ang Lalawigan sa Sugbo sa pagpasundayag sa mga maanindot ug sadya nga kultura sa mga Sugboanon.