Pwede na way face mask

File photo
File photo

Pwede na nga dili magsul-ob og face mask sa hawan nga mga dapit bisan asang dapit sa siyudad sa Sugbo.

Si Mayor Michael Rama niluwat og executive order (EO) kagahapon, Agusto 31, 2022, nga epektibo dayon sa samang adlaw bahin sa “non-obligatory” sa face mask sa open spaces ubos sa iyang hurisdiksyon sa dakbayan.

Atol sa press briefing, si Rama niingon nga ang high percentage sa vaccination rate ug ang downward trend sa coronavirus disease 2019 (Covid-19) cases usa sa mga basehanan sa iyang pagluwat sa maong EO.

Sa Agusto 31, ang City Health Department nitala og kinatibuk-ang 850,351 vaccinated individuals, samtang 177,570 ka mga tawo ang nakadawat sa unang booster shot.

Matod sa mayor, nihimo siya og konsultasyon sa multi-sectoral convergence sa wala pa mohimo sa naasoy nga hukom bahin sa face masks.

“Such executive order did not come up out of thin air but based on circumstances,” matod ni Rama.

Hinuon, ang EO nagkanayon nga ang pagsul-ob og face masks, “individually taken by all citizens as a measure of self-preservation and protection under the principle of shared responsibility and mutual respect.”

Ang pribadong establisemento gihatagan og discretionary power sa pagdeterminar kon motugot sa mga mosulod ang walay face mask.

Si Rama nagkanayon usab nga ang pagsakay sa public utility vehicle, ang pagsul-ob sa face masks depende sa diskresyon sa mga drayber ug operators.

Sa mga tunghaan, si Rama nagkanayon nga naa sa hukom sa Department of Education ug mga ginikanan.

EXCEPTIONS

Apan ang EO naglatid sa exceptions sa mando nga gikinahanglan gihapon nga isul-ob ang face mask kon mosulod sa health facilities sama sa hospitals ug clinics.

Ang mga tawo nga dunay flu-like symptoms kinahanglang mag-face masks, labina sa gawas sa panimalay.

Isip general rule, ang Kagamhanan sa dakbayan sa Sugbo uyon sa non-obligatory sa paggamit sa face masks sulod sa iyang hurisdiksyon apan nagtahod sa katungod sa indibiduwal sa paggamit niini.

Niadtong Hunyo 2022, si Cebu Governor Gwendolyn Garcia niluwat og EO nga optional ang pagsul-ob og face masks sa outdoor ug well-ventilated areas.

Ang aksiyon sa gobernador nahimong nasudnong kontrobersiya dihang si kanhi Department of the Interior and Local Government (DILG) Secretary Eduardo Año wala moila sa pagka balido sa EO ug nimando sa awtoridad sa pagpanakop sa walay face mask sa publikong dapit.

Dihang gipangutana si Rama kon nikonsulta ba siya sa Department of Health (DOH) ug DILG, ang mayor nagkanayon nga wala na kinahanglana kini tungod sa awtonomiya sa local government units, labi na sa isyu sa panglawas.

“We in the local government units are better in terms of how we are seeing the roots of social and health activities,” matod ni Rama.

Sumala ni Rama, iyang padad-an sa kopya sa EO si DILG Secretary Benjamin Abalos Jr., dili aron pagpaaprobar, apan sa pagpahibawo sa kalihim sa unod sa iyang EO.

SUPORTA

Si Police Lieutenant Colonel Wilbert Parilla, deputy city director for administration sa Cebu City Police Office (CCPO), nagkanayon ang kapulisan mosuporta sa EO sa mayor.

Apan gipasabot ni Parilla nga bisan sa bag-ong lagda sa mayor, padayon gihapon sila sa pagpahimangno sa katawhan nga dili mokompyansa ug labing maayo nga magsul-ob og face mask.

Sa ilang Oplan Bulabog matag gabii, wala na moestrikto bahin sa face mask.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph