DUHA ka pedestrian lane nga duol sa Mandaue City Hall ang gipintalan og rainbow colors ug nagtaod usab og dako nga LGBT (Lesbian, Gay, Bisexual and Transgender) flag atubangan sa Mandaue City Hall Huwebes sa buntag, Hunyo 13, 2019.
Ang pagpintal sa kadalanan usa ka paagi sa Mandaue sa pagsaulog sa LGBT o Pride month.
Karong Biyernes sa gabii, Hunyo 14, alas 6 hangtud sa alas 7:30 himuon ang susama og fiesta nga Pride March, diin dili lang ang LGBT community sa Mandaue ang mosalmot kon dili lakip na gikan sa silingang mga siyudad ug lungsod.
Gilantawan nga susama sa niaging tuig moabot sa libuan ang mosalmot sa maong kalihokan.
Ang mga dalan nga S.B. Cabahug, A. Soriano Street, Plaridel Avenue ug Dalan C. Ouano ang agian sa LGBT Pride march.
Hinungdan nga hangyo ni Atty. Regal Oliva, ang nangulo sa kalihukan, sa mga motorista ug sa tanan nga mag-agian sa Dakbayan sa Mandaue nga patas-an ang pasensya sa posible nga paghuot sa trapiko karong Biyernes sa gabii sa dul-an duha ka oras.
Ang mga dalan nga S.B. Cabahug, A. Soriano Street, Plaridel Avenue ug Dalan C. Ouano ang agian sa LGBT Pride march.
Pipila ka dalan ang masirad-an. Ang usa ka lane mao'y gamiton diha sa ilang pagparada.
Nag-una nga mensahe sa pride march ning mao ang pagpasar sa mga Sexual Orientation and Gender Identity (SOGI) laws. Superbalita Cebu